दौंड, ता. १९ : दौंड नगरपालिकेच्या निवडणुकीत सदस्यपदाकरिता दाखल १७७ उमेदवारी अर्जांपैकी २७ अर्ज अवैध ठरविण्यात आले आहेत. जनतेतून थेट निवडून द्यावयाच्या नगराध्यक्षपदाकरिता दाखल सर्व १३ अर्ज वैध ठरविण्यात आले.
दौंड नगरपालिकेच्या तेरा प्रभागांमधील २६ जागांकरिता एकूण १७७ उमेदवारी अर्ज दाखल केले होते. त्यापैकी पक्षाची अधिकृत उमेदवारी नसणे, मतदारयादीची प्रमाणित प्रत नसणे, आदी कारणांवरून २७ जणांचे सदस्यपदाकरिताचे अर्ज अवैध ठरविण्यात आले. त्यामुळे २६ जागांकरिता १२१ जणांचे एकूण १५० उमेदवारी अर्ज वैध ठरले आहेत. उमेदवारी अर्जांच्या छानणीदरम्यान नगरपालिकेचे ठेका किंवा कंत्राटाद्वारे लाभार्थी असणे, जात वैधता प्रमाणपत्र, आदी मुद्द्यांच्या आधारे चार हरकती घेण्यात आल्या. त्या चार हरकती सुनावणी घेत निकाली काढण्यात आल्या आहेत, अशी माहिती निवडणूक निर्णय अधिकारी नीलप्रसाद चव्हाण यांनी दिली.