दौंड : छत्रपती शिवाजी महाराज टर्मिनस मुंबई-बिदर सुपरफास्ट एक्सप्रेसमधील एका प्रवाशाची महत्त्वाची कागदपत्रे असलेली सॅकबॅग चोरीस केली आहे. तुकाराम रामराव वाघमारे (वय २५ , रा. देवर्जन, ता. उदगीर) हे शुक्रवारी (ता. १६) मुंबई-बिदर सुपरफास्ट एक्स्प्रेसने कल्याण ते उदगीर असा प्रवास करीत होता. प्रवासाच्या दरम्यान झोपेतून उठल्यावर आणि दौंड रेल्वे स्थानकावर एक्स्प्रेस आल्यानंतर त्यांना शनिवारी (ता. १७) टॅब, पॅनकार्ड, आधार कार्ड, रोकड, आदी कागदपत्रे असलेली सॅकबॅग चोरीस गेल्याचे लक्षात आले. सॅकबॅगमधील एकूण २२ हजार १९९ रुपयांचा ऐवज चोरीस गेल्याचे फिर्यादीत नमूद करण्यात आले आहे. याबाबत तुकाराम वाघमारे यांनी परळी लोहमार्ग पोलिस ठाण्यात तक्रार नोंदविल्यानंतर हा गुन्हा तपासाकरिता दौंड लोहमार्ग पोलिस ठाण्यात वर्ग करण्यात आला. दौंड लोहमार्ग पोलिस ठाण्यात या प्रकरणी ज्ञात चोरट्याविरुद्ध चोरीचा गुन्हा दाखल केला आहे.