दौंड, ता. २३ : दौंडमध्ये जनता कॉलनी परिसरात बालकाच्या मृत्यू प्रकरणी भरधाव वेगाने रोडरोलर चालविणार्या चालकावर गुन्हा दाखल करण्यात आला आहे. रोडरोलर खाली सापडून बालकाचा मृत्यू झाला होता.
दौंड पोलिसांनी शुक्रवारी (ता. २३) याबाबत माहिती दिली. सेंट सेबॅस्टियन हायस्कूलच्या मागील रस्त्याचे डांबरीकरण सुरू असताना गुरूवारी (ता. २२) दुपारी शिवालय अपार्टमेंट समोर रोडरोलर खाली सापडून आर्यन संतोष जाधव (वय ४) याचा चिरडून मृत्यू झाला होता. दौंड पोलिस ठाण्यात या प्रकरणी संतोष मारूती जाधव (मूळ रा. विजापुर, कर्नाटक) यांनी या प्रकरणी फिर्याद दिली आहे. रोलर फिरविताना रस्त्याकडे दुर्लक्ष करुन पाठीमागे न बघता परशुराम राठोड याने वेगात पाठीमागच्या दिशेने रोडरोलर चालवून आर्यन जाधव यास धडक बसली. यामध्येच चिरडून त्याचा मृत्यू झाल्याचे फिर्यादीत नमूद केले आहे. फिर्यादीनुसार रोडरोलर चालक परशुराम शंकर राठोड (रा. अंकलगा, ता जेवर्गी, जि. गुलबर्गा, कर्नाटक) याच्याविरूध्द निष्काळजीपणामुळे मृत्यूस कारणीभूत ठरल्याप्रकरणी गुन्हा दाखल केला आहे.

दरम्यान जनता कॉलनी येथील रहिवाशांनी दौंड पोलिस ठाण्यात पोलिस अधिकाऱ्यांची भेट घेतली. डांबरीकरणाचे काम सुरू असताना वाहतूक बंद न करता आणि कोणतीही सुरक्षा उपाययोजना न करता रस्त्याचे काम दोन महिन्यांपासून सुरू आहे. रोडरोलर खाली सापडून मृत्यू झालेल्या बालकाच्या मृत्यू प्रकरणी संबंधित कंत्राटदार, सार्वजनिक बांधकाम विभागाचे अधिकारी व या दुर्देवी मृत्यूला जबाबदार असणाऱ्या सर्व दोषींवर गुन्हे दाखल करण्याची लेखी मागणी रहिवाशांनी केली. परंतु पोलिसांनी रोलर चालकावर गुन्हा दाखल करीत कंत्राटदार व संबंधित अधिकाऱ्यांवर कोणतीही कारवाई केली नाही. रोडरोलर चालक फरार असून शुक्रवारी रस्ता डांबरीकरणाचे काम बंद होते.