दौंड, ता. ३ : छत्रपती शिवाजी महाराज महाराजस्व समाधान शिबिरांतर्गत दौंड तालुक्यात ७ मार्चपासून दोन शिबिरांचे आयोजन करण्यात आले आहे. दौंड तालुक्याचे तहसीलदार अरुण शेलार यांनी याबाबत माहिती दिली. छत्रपती शिवाजी महाराज महाराजस्व समाधान शिबिराचे ७ मार्च रोजी यवत (ता. दौंड) येथील श्री काळभैरव मंदिर परिसरातील पालखी सभामंडप येथे आयोजन करण्यात आले आहे. त्यानंतर १४ मार्च रोजी पाटस येथे शिबिराचे आयोजन होणार आहे.
महसूल विभागांतर्गत सर्वसामान्य जनता, शेतकरी, विद्यार्थी व महिला यांचे महसूल विभागाशी संबंधित दैनंदिन प्रश्नांचे निराकरण करणे व जनतेच्या तक्रारी निकालात काढण्यासाठी हे शिबिर घेतले जात आहे. महसूल प्रशासन गतिमान करण्यासाठी दौंड तालुक्यात मंडल स्तरावर ही शिबिरे घेतले जात आहेत.
शिबिरात प्रलंबित फेरफार निकाली काढणे, जिवंत सातबारा मोहीम, शालेय दाखल्यांचे वितरण, विशेष अर्थसाह्य योजनांचा लाभ, पीएम किसान योजना, ॲग्रिस्टॅक योजना, सातबारा उतारे अद्ययावत करणे, नवीन अकृषक धोरणाची माहिती देणे, भोगवटा क्रमांक - २च्या जमिनी नियमानुसार वर्ग -१ करण्याबाबत कार्यवाही प्रक्रिया, तुकडेबंदी धोरणाबाबत कार्यवाही प्रक्रिया आदी कामे प्रामुख्याने केली जाणार आहेत. ग्रामस्थ, शेतकरी, विद्यार्थी यांनी शिबिरांचा लाभ घ्यावा, असे आवाहन तहसीलदार शेलार यांनी केले आहे.