दौंड, ता. ३ : बिदर-मुंबई सुपरफास्ट एक्सप्रेस आणि नांदेड-पनवेल एक्सप्रेसमधील तीन प्रवाशांचे एकूण तीन मोबाइल चोरीस गेले आहेत. पहिली चोरी रविवारी (ता. १) बिदर-छत्रपती शिवाजी महाराज मुंबई सुपरफास्ट एक्सप्रेसमध्ये झाली. धाराशिव ते मुंबई असा वातानुकूलित डब्यातून प्रवास करणारे मोहमंद शकील अन्सारी (वय ६१, रा. अंधेरी-कुर्ला रस्ता, मुंबई) यांचा मोबाइल बार्शी ते दौंड रेल्वे स्थानक दरम्यान चोरीस गेला. दुसरी चोरी नांदेड-पनवेल एक्सप्रेसमध्ये सोमवारी (ता. २) झाली. किशन महादेव जाधव (वय २१, रा. परळी वैजनाथ, जि. बीड) हे आईसह परळी ते दौंड असा आरक्षित डब्यातून प्रवास करीत होते. प्रवासाच्या दरम्यान दौंड रेल्वे स्थानक येण्यापूर्वी त्यांना त्यांचा व त्यांच्या आई यांचा मोबाइल चोरीस गेल्याचे लक्षात आले. दौंड लोहमार्ग पोलिस ठाण्यात या प्रकरणी दाखल दोन स्वतंत्र फिर्यादीनुसार अज्ञात चोरट्यांविरूध्द चोरीचा गुन्हा दाखल करण्यात आला आहे.