देऊळगाव राजे, ता. १४ : आलेगाव- धुमाळवस्ती येथे घरगुती भांडणे मिटविण्यासाठी गेलेल्या दौंड पोलिसांना दोन जणांनी जबर मारहाण केल्याचा धक्कादायक प्रकार घडला आहे.
या प्रकरणी दौंड पोलिसांनी कांतिलाल रघुनाथ भोकारे व अशोक रघुनाथ भोकारे (दोघेही रा. आलेगाव धुमाळवस्ती) यांच्यावर गुन्हा दाखल केला आहे. याबाबत दौंड पोलिस ठाण्यात नजीर गफुरभाई तांबोळी (नेमणूक- दौंड पोलिस ठाणे) यांनी फिर्याद दाखल केली आहे. त्यानुसार, ‘११२’ या पोलिस मदत क्रमांकावर संपर्क साधल्याने पडताळणी करण्यासाठी नजीर तांबोळी व सोबत पोलिस कॉन्स्टेबल बी. जी. येणारे हे सरकारी वाहनाने धुमाळवस्ती येथ गेले. तेथे पोचल्यावर कांतिलाल व अशोक भोकरे यांनी, ‘तुम्ही पोलिस, आमच्या घरगुती भांडणात का पडता?’ असे म्हणून त्यांना शिवीगाळ केली.त्यानंतर, ‘तुमची नोकरीच घालून टाकतो,’ अशी अशी धमकी देत, ‘आम्ही कोण आहे, ते तुम्हाला दाखवतोच,’ अशी पुन्हा धमकी देत पोलिसांच्या अंगावर धावून आले. त्यावेळी अशोक भोकारे याने नजीर यांच्या अंगावरील गणवेशाचा शर्ट धरून त्यांना खाली पाडून लाथाबुक्क्यांनी पाठीत व पोटात मारहाण केली. तसेच, कांतीलाल भोकारे याने हातात लोखंडी कोयता घेऊन येणारे यांना मारहाण करण्याचा प्रयत्न केला, असे फिर्यादीत म्हटले आहे. नजीर यांच्या फिर्यादीनुसार दौंड पोलिसांनी दोघांवर गुरूवारी (ता. १३) गुन्हा दाखल केला. या प्रकरणाचा पुढील तपास पोलिस हवालदार महेंद्र लोहार करीत आहे.
दरम्यान, पोलिसांनी दोन्ही संशयितांना गुरुवारी अटक करून दौंड न्यायालयात हजर केले. न्यायालयाने त्यांना १५ मार्चपर्यंत पोलिस कोठडीत ठेवण्याचे आदेश दिले आहेत.