देऊळगाव राजे, ता. २५ : देऊळगाव राजे (ता. दौंड) व परिसरातील गावांमध्ये रविवारी जोरदार पाऊस झाला. सलग दोन दिवस झालेल्या मोठ्या पावसामुळे ओढे व नाल्यांना पूर आला आहे. आठ दिवसांच्या पावसामुळे खरीप हंगाम लांबणीवर जाणार आहे.
दौंड तालुक्यात गेली आठ दिवस ठिकठिकाणी पाऊस पडत आहे. यामुळे ऊस लागवड व खरीप हंगामातील पिकांची पेरणी रखडली आहे. अशातच शनिवारी व रविवारी जोरदार पाऊस झाला. रविवारी दुपारी सलग दोन पाऊस झाला. सलग झालेल्या पावसामुळे ओढे, नाले पाण्याने भरून वाहत आहेत. रस्त्यावर पाणी साचले होते. शेतामध्येही पाणी साचले आहे. भीमा नदीच्या पाणीपातळीत मोठी वाढ झाली आहे. ओढ्यांना पाणी आल्याने वाहतूक बंद पडली आहे. नागरीकांना जाण्यायेण्यासाठी पर्यायी मार्गाने जावे लागले.
सलग आठ दिवस झाले चांगला अवकाळी पाऊस पडत असल्याने खरीप हंगामातील कपाशी, उडीद, सोयाबीन, मका यांच्या पेरण्या व लागवडी किमान दोन ते तीन आठवडे लांबणीवर जाण्याची शक्यता आहे. अनेक शेतकऱ्यांनी कपाशीचे बियाणे खरेदी केले आहे. परंतु पाऊस मात्र थांबलेला नाही. तुटणाऱ्या उसांना पाऊस उपयुक्त झाला आहे. तोडणीस आलेले कलिंगड व खरबूज पिकांचे मोठे नुकसान झाले आहे. त्यातच कलिंगडाची विक्री होत नसल्याने शेतकऱ्यांना ते फेकून देण्याची वेळ आली आहे.