देऊळगाव राजे, ता. १६ : आलेगाव पुनर्वसन (ता. दौंड) येथील जिल्हा परिषद प्राथमिक शाळेमध्ये उपमुख्यमंत्री अजित पवार यांच्या हस्ते इयत्ता पहिलीतील नवगत विद्यार्थ्यांचे गुलाबपुष्प देऊन स्वागत करण्यात आले. तसेच विद्यार्थ्यांना शैक्षणिक साहित्य व पाठ्यपुस्तकांचे वाटपही त्यांच्या हस्ते करण्यात आले. यावेळी पवार यांनी विद्यार्थ्यांशी संवादही साधला.
राज्याच्या शालेय शिक्षण विभागाने शाळेच्या पहिल्या दिवशी शाळांमध्ये शाळा प्रवशोत्सव २०२५ आयोजन केले होते. त्यानुसार आलेगाव पुनर्वसन येथील शाळेमध्ये सकाळी उपमुख्यमंत्री पवार हे विद्यार्थ्यांचे स्वागत करण्यासाठी उपस्थित राहिले.
यावेळी माजी जिल्हा परिषद सदस्य वीरधवल जगदाळे, दौंड पंचायत समितीचे गटविकास अधिकारी महेश डोके, गटशिक्षण अधिकारी संजय महाजन, विषयतज्ञ ज्ञानेश्वर माळी, केंद्रप्रमुख आशा घाडगे, सरपंच नवनाथ कदम, ग्रामसेविका अर्चना भागवत, शाळा व्यवस्थापन समितीचे अध्यक्ष संभाजी कुतवळ, मुख्याध्यापिका अनिता खताळ आदी उपस्थित होते.
यावेळी उपमुख्यमंत्री पवार म्हणाले, ‘‘भावी पिढी घडविण्यासाठी विद्यार्थ्यांना आधुनिक, दर्जेदार शिक्षण उपलब्ध करून देण्यासोबतच सर्व शाळांमध्ये पायाभूत सुविधा उपलब्ध करून देणे ही राज्य शासनाची नैतिक जबाबदारी आहे. त्यादृष्टीने विद्यार्थ्यांना मोफत पाठ्यपुस्तके, गणवेश, बूट उपलब्ध करून देण्यात येत आहेत. याकरिता राज्य शासन शिक्षणावर मोठ्या प्रमाणात खर्च करीत आहे. विद्यार्थ्यांना शिक्षण घेताना अडीअडचणी येणार नाही. याबाबत दक्षता घेण्यात येत आहे.’’ शाळेच्या वतीने मुख्याध्यापिका खताळ यांनी उपमुख्यमंत्री पवार यांचे स्वागत केले.
देऊळगाव राजे येथे स्वागत
दरम्यान, देऊळगाव राजे (ता. दौंड) येथील जिल्हा परिषद प्राथमिक शाळेत व सिद्धेश्वर माध्यमिक विद्यालयात वाजत-गाजत नवोदित विद्यार्थ्यांचे स्वागत करण्यात आले. तसेच पाठ्यपुस्तक, साहित्य व गणवेशाचे वाटप मान्यवरांच्या हस्ते करण्यात आले.