देऊळगाव राजे, ता. १७ : शिरापूर (ता. दौंड) येथील निवृत्त सहाय्यक पोलिस फौजदार राजेंद्र नामदेव नागवडे यांना दौंड येथे सराफी पेठेत सव्वालाख रुपये किमतीचा आय फोन (प्रो १६) मोबाइल रस्त्यावर सापडला. त्यांनी तो प्रामाणिकपणे संबंधिताला परत केला. त्यामुळे त्यांचे कौतुक होत आहे.
अतिष व्हंकाडे यांनी तीन महिन्यांपूर्वी सव्वा लाख रुपये किमतीचा आय फोन (प्रो १६) मोबाइल खरेदी केला, परंतु दुचाकी चालवत असताना त्यांच्या खिशातून मोबाइल कधी पडला, ते समजले नाही. दरम्यान, तो मोबाइल नागवडे यांना दिसला. त्या मोबाइलच्या कडेने दोन दुचाकीही गेल्या. त्यामुळे त्यांनी आसपास चौकशी केली मात्र तो कोणाचा आहे, ते समजले नाही. त्यामुळे काही वेळाने ते घरी आले. दरम्यान, मोबाइल हरवल्याचे लक्षात आल्याने अतिष यांनी शोधाशोध सुरू केली, परंतु मोबाइल मिळाला नाही. त्यामुळे त्यांनी मोबाइलच्या नंबरवर फोन केला. त्यावेळी नागवडे यांनी फोन उचलण्यात आला. त्यांनी सांगितले की, ‘मोबाईल सुरक्षित आहे. मोबाइल घेऊन जावा.’ ते ऐकून त्यांना धीर आला. त्यांनी मोबाइल घेतलेल्या दुकानाची पावती घेऊन आले व ओळख पटवून नागवडे यांच्याकडून मोबाइल घेऊन गेले. नागवडे यांच्या प्रामाणिकपणामुळे त्यांना मोबाइल परत मिळाला. त्यामुळे परिसरात नागवडे यांच्यावर कौतुकाची थाप पडत आहे.