दावडी, ता. ५ : खेड तालुक्यात सध्या रोहित्र चोरीच्या घटनांमध्ये लक्षणीय वाढ झाल्याने नागरिकांमध्ये चिंतेचे वातावरण निर्माण झाले असून, विशेषतः खेड तालुक्याच्या पूर्व विभागातील दावडी, साबळेवाडी आणि मरकळ या गावांमध्ये रोहित्र चोरीचे प्रमाण वाढल्याने कारवाईसाठी खेड पोलिस ठाण्यामध्ये ग्रामस्थांनी निवेदन दिले आहे.
या पार्श्वभूमीवर जिल्हा परिषद सदस्य तथा खेड कृषी उत्पन्न बाजार समितीचे सभापती विजयसिंह शिंदे यांनी ग्रामस्थांंसह महाराष्ट्र राज्य वीज वितरण कंपनी मर्यादित कार्यालयात जाऊन अधिकाऱ्यांशी चर्चा केली. यावेळी वीज समस्यांवर सविस्तर चर्चा करत भविष्यात अशा प्रकारच्या घटना टाळण्यासाठी ठोस उपाययोजना करण्याची मागणी केली. रोहित्र चोरी रोखण्यासाठी तातडीने प्रभावी पावले उचलावीत, अशी आग्रही भूमिका यावेळी मांडण्यात आली. यानंतर खेड पोलिस ठाण्याला भेट देऊन पोलिस अधिकारी चव्हाण यांच्याशी चर्चा करून रोहित्र चोरांचा तत्काळ छडा लावून संबंधितांवर कडक कारवाई करावी, अशी मागणी केली. यावर पोलिस अधिकाऱ्यांनीही त्वरित कारवाई करण्याचे आश्वासन दिले.
यावेळी संभाजी घारे, अनिल नेटके, किरण लोखंडे, विजयानंद आवटे, सुनील वर्पे, अक्षय चव्हाण, संदीप साबळे, पंकज गायकवाड, कैलास घेनंद, सागर चव्हाण, योगेश कुटे, नितीन आवटे, रूपेश घारे, दत्तात्रेय वर्पे, दत्तू अण्णा वर्पे, संदीप वर्पे, अनिकेत लोखंडे, सोन्या लोखंडे, बबलू लोखंडे आदींसह ग्रामस्थ उपस्थित होते.