घोडेगाव, ता. १० ः नागापूर (ता. आंबेगाव) येथे शेतमजुरी करणाऱ्या आदिवासी कुटुंबातील एकनाथ बर्डे या व्यक्तीस शेतमालकाने अपमानास्पद वागणूक देऊन व मारहाण केल्यामुळे एकनाथ बर्डे यांनी गळफास घेऊन आत्महत्या केल्याची घटना घडली. दोषी व्यक्तींवर कडक कारवाई करावी, अशी मागणी माकपच्या वतीने आंबेगाव तहसीलदार यांच्याकडे करण्यात आली. या घटनेचा मार्क्सवादी कम्युनिस्ट पक्षाच्या आंबेगाव तालुका समितीने तीव्र शब्दात निषेध व्यक्त केला आहे.
आरोपी घनश्याम निकम याला पोलिसांनी अटक करून त्याच्यावर आत्महत्येस प्रवृत्त करणे, अल्पवयीन मुलीवर अत्याचार करणे व अनुसूचित जाती-जमाती अत्याचार प्रतिबंध कायद्यानुसार गुन्हा दाखल केला आहे.
पीडित कुटुंबाला न्याय मिळेपर्यंत हे प्रकरण पोलिसांनी धसास लावावे व गुन्हेगारास कडक शिक्षा व्हावी, अशी मागणी माकप आंबेगाव तालुका समितीने निवेदनाद्वारे केली. शासनाने पुढील काळात पीडित कुटुंबाला आवश्यक ते सहकार्य करावे, अशी मागणी निवेदनात करण्यात आली. यावेळी माकप तालुका समितीचे बाळू वायाळ, डॉ. अमोल वाघमारे, अशोक पेकारी, राजू घोडे, अविनाश गवारी, देविका भोकटे आदी उपस्थित होते.