घोडेगाव, ता. ३ : एकात्मिक आदिवासी विकास प्रकल्प कार्यालयाच्या माध्यमातून न्यूक्लिअस बजेट योजनेअंतर्गत अनुसूचित जमातीच्या कल्याणासाठी विविध योजनांची अंमलबजावणी करण्यात येत आहे. संबंधित योजना अ व क गटातील वैयक्तिक व सामूहिक लाभ या स्वरूपाच्या आहेत. या योजनेकरिता इच्छुक व पात्र लाभार्थ्यांनी ऑनलाइन पद्धतीने विहित मुदतीमध्ये अर्ज दाखल करावे, असे आवाहन एकात्मिक आदिवासी प्रकल्प अधिकारी प्रदीप देसाई यांनी केले.
या एकात्मिक आदिवासी विकास प्रकल्प कार्यालयांतर्गत पुणे, सातारा, सांगली व कोल्हापूर या चार जिल्ह्यांचा समावेश आहे. सन २०२५-२६ या आर्थिक वर्षासाठी न्यूक्लिअस बजेट (केंद्रवर्ती अर्थसंकल्प) योजनेकरिता संबंधित संकेतस्थळावर इच्छुक, पात्र अनुसूचित जमातीचे लाभार्थी, बचतगट, सहकारी संस्था यांच्याकडून ऑनलाइन पद्धतीने २ जून ते १५ जुलैपर्यंत अर्ज मागविण्यात येत आहे. वैयक्तिक लाभार्थ्यांसाठी मासेजाळी, शेतपेटी व वजन काटा खरेदी, मिरची कांडप, पर्यटन स्थळांच्या ठिकाणी व्यवसायासाठी, खेकडा हॉटेल व्यवसाय आदी विविध व्यवसायासाठी अर्थसाहाय्य करण्यात येणार आहे. तर बचतगट लाभार्थ्यांसाठी केटरिंग व्यवसायासाठी भांडी, वीटभट्टी व्यवसाय, बँजो व्यवसायासाठी, मध संकलन व विक्री व्यवसायासाठी, खेकडा बिज तयार करणे, ढाबा व्यवसाय आदी विविध व्यवसायांसाठी अर्थसाहाय्य देण्यात येणार आहे.
या योजनेस अर्ज करणारे वैयक्तिक लाभार्थी बचतगटातील लाभार्थी हे अनुसूचित जमातीचे असणे बंधनकारक आहे. पेसा क्षेत्रातील अनुसूचित जमातीच्या लाभार्थ्यांस वैयक्तिक लाभाकरिता ग्रामसभेचा ठराव अर्जासोबत अपलोड करणे आवश्यक आहे.