घोडेगाव, ता. १ ः श्री क्षेत्र भीमाशंकर येथे वाहनतळ ते बसस्थानक या ५ किलोमीटरदरम्यान वाहतूक करण्यासाठी एसटी महामंडळाच्या बस अपुऱ्या पडत आहेत. भाविकांची गैरसोय होऊ नये यासाठी टुरिस्ट परमीट व ऑल इंडिया परमीटच्या मिनीबस चालू करण्यास परवानगी मिळावी, अशी मागणी घोडेगाव (ता. आंबेगाव) येथील श्री राजा हरिश्चंद्र बस चालक मालक संघटना यांनी लेखी निवेदनाद्वारे घोडेगाव पोलिस ठाण्याचे सहायक पोलिस निरीक्षक सागर पवार यांच्याकडे केली आहे.
श्रावण यात्रेच्या अनुषंगाने शनिवार ते सोमवार या कालावधीत एसटी महामंडळाच्या बसेस मुबलक प्रमाणात उपलब्ध असतात. मात्र, मंगळवार ते शुक्रवार या दरम्यान मुबलक प्रमाणात नसतात. त्यामुळे या दिवसांमध्ये भाविकांची मोठ्या प्रमाणात गैरसोय होते. तसेच, श्रावण यात्रा झाल्यानंतर वाहतळांपासून बसस्थानकापर्यंत क्वचित एसटी महामंडळाच्या दोन-तीन बस उपलब्ध असतात. त्यामुळे येणाऱ्या भाविकांकडून खासगी वाहनचालक १०० रुपयांहून अधिक रक्कम घेत लूट करीत असल्याने विना परमिटची खासगी वाहने प्रशासनाने बंद केली आहे.
या अनुषंगाने घोडेगाव येथील श्री राजा हरिश्चंद्र बस चालक मालक संघटनेने जून २०२५ रोजी उपप्रादेशिक परिवहन पिंपरी चिंचवड, घोडेगाव पोलिस ठाणे, आंबेगाव तहसीलदार, श्री भिमाशंकर देवस्थान ट्रस्ट आदींना निवेदन दिले आहे. या निवेदनात त्यांनी संघटनेच्या १७ व २० सीटांच्या मिनीबस असून, त्या सर्व टुरिस्ट परमीट व काही ऑल इंडिया परमीट आहे. बस नियमाप्रमाणे गाडीवर मालक व चालक असल्यास त्याप्रमाणे ड्रेस कोड, बॅच, वाहन परवाना, गाडीचा इंन्सुरन्स आदी शासनाच्या नियमाप्रमाणे सर्व कागदपत्रे असणार आहेत. तसेच, निगडाळे येथील वाहनतळापासून ते भीमाशंकर बसस्थानकापर्यंत एसटी महामंडळ भाविकांकडून जो दर आकारत आहे, तोच दर भाविकांकडून घेतला जाणार असून, दराबाबतचा उल्लेख बसच्या दर्शनीभागात लावण्यात येणार आहे. कोणताही अतिरिक्त दर भाविकांकडून घेण्यात येणार नाही, भाविकांना त्रास होणार नाही याचीही दक्षता घेण्यात येईल, असे संघटनेचे अध्यक्ष सूर्यकांत काळे, नीलेश काळे, गणेश घोलप यांनी सांगितले.