घोडेगाव, ता. २ : आंबेगाव तालुक्यात सध्या २७ कुपोषित बालके असून, पावसाला सुरुवात झाल्यापासून ४७ नव्या बालकांचा यात समावेश झाला आहे. याला उपाय म्हणून जिल्हा परिषदेने कुपोषणमुक्त पुणे जिल्हा अभियान सुरू केले आहे. या अभियानांतर्गत कुपोषित बालकांसाठी विविध उपाययोजना राबवल्या जात आहेत.
पावसाळ्यात मुलांचे आजारी पाडण्याचे प्रमाण वाढते. शिवाय शेतीच्या कामामुळे पालकांचे मुलांच्या आरोग्याकडे दुर्लक्ष होते. समतोल आहाराच्या कमतरतेमुळे मुलांच्या वजनात घट होऊन कुपोषणाचे प्रमाण वाढते, असे निरीक्षण आहे. जिल्हा परिषदेचे मुख्य कार्यकारी अधिकारी गजानन पाटील यांनी कुपोषणमुक्त जिल्ह्यासाठी विविध योजना राबवल्या आहेत. यात दत्तक पालक योजना अंतर्गत तालुक्यात शासकीय कर्मचाऱ्यांना एका कुपोषित बालकाची जबाबदारी देण्यात आली आहे.

तालुक्यात कुपोषित बालकांसाठी नियमित आरोग्य तपासणी, पोषण किट, बाळंत विडा, मिलेट बूस्टर, पालकांसाठी समुपदेशन, अतिरिक्त आहार, पंजेरी मायक्रो न्यूट्रेट आणि सिरप यांचा पुरवठा केला जात आहे. गंभीर कुपोषित (सॅम) बालकांना औंध येथील रुग्णालयात उपचारासाठी पाठवले जाते. येथे बालक आणि पालकांसाठी सर्व सोयी उपलब्ध असून, पालकांना बुडीत मजुरी दिली जाते.
के. बी. जाधव, बाल विकास प्रकल्प अधिकारी

आंबेगाव, जुन्नरमध्ये ६०१ सौम्य कुपोषित बालके
आंबेगाव आणि जुन्नर तालुक्यात ममता हेल्थ इन्स्टिट्यूट फॉर मदर अॅन्ड चाइल्ड आणि पेप्सिको फाउंडेशनच्या माध्यमातून सौम्य कुपोषित बालकांसाठी काम सुरू आहे. सध्या आंबेगाव तालुक्यात २२४ आणि जुन्नर तालुक्यात ३७७ अशी एकूण ६०१ सौम्य कुपोषित बालके आहेत. ही संस्था सौम्य कुपोषित बालकांचा शोध घेते आणि त्यांना सहा महिने ‘पंजेरी’ नावाचा सुका खाऊ पुरवते.

अंगणवाडीतील रिक्त पदांचा प्रश्‍न
आंबेगाव तालुक्यात सध्या अंगणवाडी सेविकांच्या आणि अंगणवाडी मदतनीसांच्या १४ जागा रिक्त आहेत. तीन महिन्यांपूर्वी काही सेविका आणि मदतनीसांची भरती झाली असली, तरी उर्वरित रिक्त जागा लवकरच जिल्हा परिषदेमार्फत भरणार असल्याचे सांगण्यात आले. कुपोषणमुक्त पुणे जिल्ह्यासाठी राबवल्या जाणाऱ्या या उपाययोजनांमुळे आंबेगाव तालुक्यातील बालकांच्या आरोग्यात सुधारणा होण्याची आशा आहे.