घोडेगाव, ता १७ : पेसा क्षेत्रातील नियुक्ती प्रक्रिया सुरू झाल्याने किसान सभेचे ११ ऑगस्टपासूनचे बेमुदत आंदोलन मागे घेतल्याची माहिती किसान सभेचे डॉ. अमोल वाघमारे यांनी दिली.
सरळ सेवा भरती प्रक्रिया २०२३ अंतर्गत पेसा क्षेत्रातील अनेक उमेदवारांची निवड होऊनही त्यांना वेळेवर नियुक्ती आदेश व मानधन मिळत नव्हते. या अन्यायाविरुद्ध अखिल भारतीय किसान सभेने पुणे जिल्हा परिषदेसमोर आंदोलन सुरू केले होते.
दरम्यान, घोडेगावात चार ऑगस्ट २०२५ रोजी पुन्हा निवेदन देऊन ११ ऑगस्ट २०२५ पासून बेमुदत धरणे आंदोलन करण्याचा लेखी इशारा किसान सभेच्या वतीने जिल्हा परिषद यांना देण्यात आला. या आंदोलनाच्या पार्श्वभूमीवर पुणे जिल्हा परिषद प्रशासनाने तातडीने पुढील महत्त्वपूर्ण पावले उचलली आहेत. उपमुख्य कार्यकारी अधिकारी आणि जिल्हा आरोग्य अधिकारी यांनी पुणे जिल्हा किसान सभेला दिलेल्या लेखी पत्राद्वारे सर्व मागण्या तातडीने पूर्ण करण्याची ग्वाही दिली.
पेसा कायद्याच्या अंमलबजावणीत होणाऱ्या ढिसाळपणावर किसान सभेने तीव्र निषेध नोंदवला असून, भविष्यातही अन्यायाविरुद्धचा लढा सुरू ठेवण्याचा निर्धार व्यक्त केला आहे. आंदोलनाच्या यशस्वी पाठपुराव्यात किसान सभेचे जिल्हा अध्यक्ष डॉ. अमोल वाघमारे, ॲड. नाथा शिंगाडे, महेंद्र थोरात, अशोक पेकारी, राजू घोडे, आमोद गरुड, संतोष कांबळे, लक्ष्मण जोशी आदींचा सहभाग होता.