घोडेगाव, ता. २० ः घोडेगाव (ता. आंबेगाव) येथील घोडनदी काठावर असलेल्या स्मशानभूमीत बुधवार रात्री (ता. २०) पुराचे पाणी घुसल्याने तीन नागरिक पाण्यात अडकले होते. स्थानिक निसर्ग साहस रेस्क्यू पथक आणि त्यांच्या सहकाऱ्यांनी त्यांना पाण्यातून बाहेर काढले.
सोमनाथ मुकणे यांनी घोडेगाव पोलिस ठाणे येथे येऊन स्मशानभूमीतील पुराच्या पाण्यात काही नागरिक अडकल्याची माहिती दिली होती. त्यानुसार निसर्ग साहस रेस्क्यू पथकाचे धनंजय कोकणे यांच्या मदतीने बोट, लाइफ जॅकेट व दोरीचा वापर करून अडकलेल्या सुनीता सोमनाथ मुकणे (वय ४६), मंदा अनिल वाघ (वय ४५), अनिल भिवा वाघ (वय ५०) यांना सुखरूप बाहेर काढले.
या बचाव कार्यावेळी तहसीलदार संजय नागटिळक, खेड विभागाचे उपविभागीय पोलिस अधिकारी अमोल मांडवे, घोडेगाव पोलिस ठाण्याचे सहाय्यक पोलिस निरीक्षक सागर पवार, यांच्यासह निसर्ग साहस संस्थेचे अध्यक्ष धनंजय कोकणे, आपदा मित्र मिलिंद भांगरे, राम फलके, अमोल वाघमारे, किरण शिंगाडे, किशोर वाघमारे उपस्थित होते.

04168