घोडेगाव, ता. ८ : पुणे विभाग पदवीधर व शिक्षक मतदारसंघ अंतर्गत आंबेगाव तालुक्यात पदवीधर व शिक्षक मतदार नोंदणी सुरू झाली आहे, अशी माहिती उपजिल्हा निवडणूक अधिकारी मीनल कळसकर, सहायक मतदार नोंदणी अधिकारी गोविंद शिंदे यांनी दिली.
विधान परिषदेच्या मतदारसंघाची मतदार यादी नव्याने तयार करण्याचा कार्यक्रम जाहीर झाला आहे. त्यानुसार एक नोव्हेंबर २०२५ पर्यंत झालेले पदवीधर व नियुक्त शिक्षक यांना मतदार म्हणून नोंदणी करता येणार आहे. मतदार नोंदणीसाठी अंतिम तारीख ६ नोव्हेंबर २०२५ आहे. यापूर्वी पदवीधर व शिक्षक मतदारसंघासाठी पात्र मतदारांनी अर्ज करावेत. प्रारूप मतदार यादी २५ नोव्हेंबर व अंतिम मतदार यादी ३० डिसेंबर २०२५ ला प्रसिद्ध होणार आहे. मतदार नोंदणी प्रक्रियेसाठी आंबेगाव तालुक्यात एकूण चार पदनिर्देशित अधिकारी नियुक्त केले आहेत. पदनिर्देशित अधिकारी अर्जाची पोच देणे, अर्जावर स्वाक्षरी करणे, कागदपत्रांच्या प्रती प्रमाणित करणे आदी कामे करणार आहेत. पदवीधर मतदार नोंदणी नमुना नंबर १८ चा फॉर्म व शिक्षक मतदार संघासाठी नमुना नंबर १९ चा फॉर्म आहे. त्यानुसार पात्र मतदारांनी ६ नोव्हेंबर पूर्वी अर्ज करावेत, असे तहसीलदार संजय नागटिळक यांनी सांगितले.