घोडेगाव, ता. १५ : पंचायत समिती व जिल्हा परिषद निवडणुकांच्या पार्श्वभूमीवर महाराष्ट्र राज्य निवडणूक आयोगाने प्रसिद्ध केलेल्या पुणे जिल्हा परिषद मूळ प्रारूप मतदार यादीमधील बोरघर पंचायत समिती निर्वाचन गणाच्या आहुपे भागाच्या यादीत काही नावे चुकीची असल्याचे व संबंधित भागातील राहिवासी नसल्याचे दिसून येत आहे. अशा बोगस नावांची पडताळणी करण्याची मागणी माकप व किसान सभेच्या वतीने करण्यात आली आहे. त्यासाठी अधिकृत हरकत नोंदवण्यात आली.
बोरघर गणातील आहुपे भागातील मतदार यादीत जवळपास ३० शंकास्पद नावे असल्याचे लक्षात येताच मार्क्सवादी कम्युनिस्ट पक्षाच्या पदाधिकाऱ्यांनी संबंधित गावातील लोकांशी संवाद साधून या नावांविषयी विचारपूस केली असता ही नावे गावातील नसल्याचे ग्रामस्थांनी सांगितले. त्यावरून मार्क्सवादी कम्युनिस्ट पक्ष व किसान सभेच्या वतीने माकप आंबेगाव तालुका कार्यालयीन सचिव अविनाश गवारी यांच्या नावे निवडणूक निर्णय अधिकाऱ्यांना मतदार यादीतील शंकास्पद नावांची पडताळणी करण्याचे लेखी मागणी देण्यात आली.
यावेळी अविनाश गवारी व किसान सभेचे अशोक जोशी, संचिता खेबडे उपस्थित होते.