घोडेगाव, ता. २३ : महाराष्ट्र शासनाने तातडीने बिबट समस्येवर उपाय योजनेसाठी ११ कोटी २५ लाख रुपयांचा निधी मंजूर केला आहे. वनविभागाच्या वतीने बिबट्या पकडण्यासाठी जे चमू प्रशिक्षित नेमबाज व ट्रॅकर स्थापित करण्यात आले आहे. त्याच्यामध्ये घोडेगाव वनपरिक्षेत्राचा समावेश करण्यात आलेला नाही. त्यामुळे येथील नागरिकांनी संताप व्यक्त केला आहे . जुन्नर वनविभागात २० चमू स्थापन करण्याचे आदेश देण्यात आले आहेत. यासाठी १ कोटी २० लाख रुपयांचा निधी मंजूर केला आहे. शासकीय आदेशाप्रमाणे एका चमूमध्ये पाच ते सहा प्रशिक्षित नेमबाज व ट्रॅकर यांचा समावेश करण्याचा आदेश काढण्यात आला आहे.
घोडेगाव येथील सामाजिक कार्यकर्ते राजेश काळे व तुकाराम काळे म्हणाले, ‘‘बिबटे ज्यावेळेस आमच्या मुलांना मारतील. त्यांना उचलून नेतील. त्यावेळेस वन विभागाला जाग येणार आहे का? त्यामुळे तातडीने घोडेगाव या वनविभागाच्या अंतर्गत एक चमू स्थापित करून त्याच्यामध्ये प्रशिक्षित नेमबाज व इतर घटकांचा समावेश करून घेण्यात यावा.’’ ‘‘घोडेगाव वनपरिक्षेत्र व भीमाशंकर अभयारण्यात अंदाजे दोनशे बिबटे असल्याचे बोलले जात आहे. सध्या ऊस तोडणी सुरू असल्याने हे बिबटे अचानक सैरभर होऊन अनेक अघटित घटना घडत आहेत.दिवसाढवळ्या बिबट्यांचा व बछड्यांचा वावर दिसत असल्यामुळे नागरिक भयभीत झाले आहेत. मुलांना शाळेत पाठवावा की नाही असा विचार आता पालक करत आहेत. येथील परिस्थिती गंभीर होण्याच्या अगोदरच बिबट्यांना जेरबंद करून अन्य ठिकाणी हलवण्यात यावे,’’ अशी मागणी वैभव काळे व सुरंजन काळे यांनी केली आहे.