घोडेगाव, ता. २२ : आंबेगाव तालुका जिल्हा परिषद व पंचायत समिती निवडणुकीच्या छाननीत एक अर्ज बाद झाला. एका अर्जावर हरकत घेण्यात आली होती, ती फेटाळली. इतर सर्व अर्ज निवडणूक निर्णय अधिकारी गोविंद शिंदे यांनी वैध ठरवले.
आंबेगाव तालुक्यातील जिल्हा परिषदेच्या ५ जागेसाठी २४; तर पंचायत समितीच्या १० जागांसाठी ५२ अर्ज दाखल झाले. या सर्व अर्जांची घोडेगाव येथे तहसील कार्यालयात छाननी करण्यात आली. यामध्ये पारगाव गटातील रवींद्र जनार्दन वळसे यांचा अर्ज बाद करण्यात आला. संबंधित उमेदवार ठेकेदार असल्याने त्यांचा अर्ज बाद करण्यात आला. त्यांच्या अर्जावर हरकतदेखील आली होती. इतर सर्व अर्ज निवडणूक निर्णय अधिकाऱ्यांनी वैध ठरवले. तसेच, अवसरी खुर्द गणातील नीलेश टेमकर यांच्या अर्जावर जिल्हा परिषदेचे गटनेते देविदास दरेकर यांनी हरकत घेतली. संबंधित उमेदवार हा ठेकेदार असून त्यांचा अर्ज बाद करावा, अशी लेखी मागणी त्यांनी केली. मात्र, त्यांच्या तक्रारीचा अर्ज निवडणूक निर्णय अधिकाऱ्यांनी फेटाळला. संबंधित उमेदवाराने अर्ज भरताना तो ठेकेदार नसल्याबाबतचा दाखला जोडला आहे. जर तो खरोखर ठेकेदार असेल, तर तक्रारदार यांनी जिल्हा व सत्र न्यायालयात अपील करावे, असे सांगत तक्रार अर्ज फेटाळला.