घोडेगाव, ता. २५ : रांजणी (ता. आंबेगाव) येथील डॉ. पियुष संजय घाडगे यांना ‘स्व. सुकाशेठ जाधव स्मृती गौरव पुरस्कार’ जाहीर झाला आहे. माजी सहकार मंत्री दिलीप वळसे पाटील यांच्या हस्ते शनिवारी (ता. २८) जाधववाडी येथे हा गौरव सोहळा पार पडणार आहे, अशी माहिती उपसरपंच संपतराव जाधव यांनी दिली.
स्व. सुकाशेठ जाधव स्मृती गौरव समितीच्या वतीने विविध क्षेत्रांतील मान्यवरांचा सन्मान करण्यात येणार असून, यात डॉ. पियुष घाडगे यांना ‘आदर्श डॉक्टर’ पुरस्काराने गौरविण्यात येईल. डॉ. घाडगे यांचे वैद्यकीय शिक्षण पुण्यात झाले असून, त्यांचे मूळ गाव वडगाव कांदळी (ता. जुन्नर) आहे. त्यांचे वडील डॉ. संजय घाडगे मागील ३० वर्षांपासून रांजणी परिसरात रुग्णसेवा देत आहेत. कोरोना काळात घाडगे परिवाराने बजावलेली निःस्वार्थ सेवा आणि गोरगरीब रुग्णांवरील अल्पदरातील उपचार यांची दखल घेऊन समितीने या पुरस्कारासाठी त्यांची निवड केली आहे. डॉ. घाडगे यांच्या संपूर्ण कुटुंबाचे वैद्यकीय क्षेत्रातील योगदान समाजासाठी प्रेरणादायी ठरले आहे. साहजिकच घाडगे परिवाराची वैद्यकीय क्षेत्रात असलेल्या योगदानाची दखल घेऊन स्वर्गीय सुकाशेठ जाधव , फूलवाले स्मृती गौरव समितीने डॉ. घाडगे यांना आदर्श वैद्यकीय सेवेबद्दलचा पुरस्कार देऊन गौरवणार असल्याची जाहीर केले आहे.