​घोडेगाव, ता. ४ : आंबेगाव तालुक्याचे भूषण ठरणारे भारतरत्न डॉ. बाबासाहेब आंबेडकर पुतळा स्मारक आणि संविधान भवन उभारणीच्या प्रक्रियेला आता गती मिळाली आहे. स्मारक समितीच्या पदाधिकाऱ्यांनी राज्याचे माजी सहकार मंत्री दिलीप वळसे पाटील यांची भेट घेतली असून, त्यांनी या प्रकल्पासाठी आवश्यक असलेली जागा हस्तांतरित करण्याबाबत अत्यंत सकारात्मक प्रतिसाद दिला आहे, अशी माहिती भारतरत्न डॉ. बाबासाहेब आंबेडकर पुतळा स्मारक व संविधान भवन समितीचे अध्यक्ष गौतम खरात यांनी दिली. स्मारकासाठी कृषी विभागाची ५ एकर जागा सामाजिक न्याय विभागाकडे वर्ग करण्याबाबत या बैठकीत सविस्तर चर्चा झाली. ही जागा तातडीने हस्तांतरित व्हावी, यासाठी कृषिमंत्री दत्तात्रेय भरणे यांच्या दालनात संबंधित अधिकारी आणि समिती पदाधिकारी यांची संयुक्त बैठक आयोजित करण्याचे आश्वासन वळसे पाटील यांनी दिले असल्याचे खरात यांनी सांगितले.
​