गुळुंचे, ता. ५ : संत ज्ञानेश्वर महाराजांचा पालखी सोहळा शनिवारी (ता. ६) पुरंदर तालुक्यातील नीरा येथून पुणे जिल्ह्यातील शेवटचा मुक्काम आटोपून सातारा जिल्ह्यात मार्गस्थ होणार आहे. या सोहळ्याच्या पार्श्‍वभूमीवर प्रशासकीय व्यवस्था अलर्ट असून स्वागताची तयारी पूर्ण झाली आहे. त्यामुळे माउलींच्या स्वागतासाठी नीरा नगरी सज्ज झाली असून माउलींच्या नीरा स्नानाच्या प्रतीक्षेत भाविक आहेत.
ग्रामपंचायतीच्या वतीने खड्डे, चिखल असलेल्या भागात मुरुमीकरण करण्याऐवजी वेस्ट खडी, सिमेंटसदृश कोरडे मिश्रण रस्त्यांच्या कडेने टाकण्यात आले आहे. यावर बारीक खडी टाकण्याची गरज असताना ती टाकली नाही. त्यामुळे अशा रस्त्यांवरुन वाट काढणे अवघड होणार आहे.
रस्त्याच्या कडेने असलेले धोकादायक, बेकायदा होर्डिंग्ज काढून टाकण्यात आले आहे. येथील ब्रिटिशकालीन पुलावरून माउलींच्या पालखीचा सोहळा मार्गस्थ होतो. दरम्यान, गतवर्षी या पुलावरून पावसाचे पाणी गेल्याने पुलाची दुरवस्था झाली होती. या पुलावर डांबरीकरण करण्यात आले आहे. मात्र, या पुलाच्या सुस्थितीबाबत स्ट्रक्चरल ऑडिटची आवश्यकता असल्याचे मत स्थानिक भाविकांनी व्यक्त केले.
नीरा स्नानाच्या पार्श्‍वभूमीवर नीरा नदीपात्रातील स्नानाच्या पायऱ्यांजवळील कचरा दूर करण्यात आला आहे. आरोग्य विभागाने जलसाठ्यांचे शुद्धीकरण केले आहे. पोलिस प्रशासन येथील मुख्य शिवाजी चौकात तसेच पुलाच्या तोंडावर खडा पहारा देत असून अवजड वाहतूक पर्यायी मार्गाने वळविण्यात आली आहे. वाहनांची तपासणी सुरू असून गस्त वाढविण्यात आली आहे.

संत ज्ञानेश्वर महाराजांच्या पालखी सोहळ्याची सर्व तयारी पूर्ण झाली आहे. ग्रामपंचायतीकडून आवश्यक त्या उपाययोजना करण्यात आल्या असून सर्वतोपरी भाविकांना सहकार्य होईल आणि सुखसोई मिळतील यासाठी आम्ही कटिबद्ध आहोत.
- तेजश्री काकडे, सरपंच, नीरा-शिवतक्रार