सासवड शहर, ता. ३० : सासवड (ता. पुरंदर) येथे जागतिक निसर्ग संवर्धन दिन आणि नागपंचमीनिमित्त पर्यावरण जनजागृतीविषयी कार्यक्रमाचे आयोजन करण्यात आले होते. २१ जुलै ते २८ जुलै दरम्यान घेण्यात आलेल्या उपक्रमात एकूण २६ शाळा आणि महाविद्यालयामधील ३००० पेक्षा जास्त विद्यार्थी, शिक्षक, पालक, सामाजिक कार्यकर्ते सहभागी झाले. ग्राम गौरव प्रतिष्ठान, पाणी पंचायत संस्थेच्या पुढाकाराने इला फाउंडेशन, वाघिरे महाविद्यालय सासवड, स्वराज्य संस्था, इको शास्त्र आणि महाराष्ट्र वनविभाग यांच्या सहकार्यातून हा कार्यक्रम यशस्वीरीत्या पार पडला.
विषारी - बिनविषारी साप यांची शास्त्रीय माहिती, साप आपल्या घराजवळ येऊ नये म्हणून घ्यावयाची काळजी, मानव आणि साप संघर्ष, त्यावर उपाय योजना, सापांविषयी समज गैरसमज या विषयावर संवाद साधण्यात आला. येणाऱ्या काळात एकही साप मारला जाणार नाही, एकाही व्यक्तीला सर्पदंश होणार नाही तसेच एकही व्यक्ती सर्पदंशाने मरणार नाही असा निर्धार करण्यात आला. या उपक्रमामध्ये मुलांच्या शंकांचे निरसन करण्यात आले. जनजागृती सप्ताहामध्ये इला फाउंडेशनचे राजकुमार पवार, स्वराज्याचे ऋषिकेश जगताप, ग्राम गौरव प्रतिष्ठानचे योगेश मगर, प्रशांत बोरावके, सागर भोंडे, ऋषी बळीद, इको शास्त्रचे शुभम ठोंबरे, दौलत कुंभार आणि मानसी नाईलकर यांनी शाळेमध्ये जाऊन मुलांशी संवाद साधला.