सासवड शहर : आताच्या परिस्थितीत संविधान वाचवण्यासाठी पुरंदर तालुक्यातील सर्व गावांना संविधान घर निर्माण करून जागृतीचे काम सुरू करा ही काळाची गरज असल्याचे प्रतिपादन सासवड साहित्य परिषदेचे माजी अध्यक्ष व ज्येष्ठ समाजवादी नेते रावसाहेब पवार यांनी केले.
सासवड (ता. पुरंदर) येथे सिद्धार्थ सामाजिक विकास प्रतिष्ठान, महाराष्ट्र राज्य यांच्या वतीने २६ नोव्हेंबर रोजी डॉ. बाबासाहेब आंबेडकर सांस्कृतिक भवन येथे संविधान दिनानिमित्त संविधान परिषदेचे आयोजन करण्यात आले होते. परिषदेचे उद्‍घाटन अभिनेते, लेखक व दिग्दर्शक डॉ. मिलिंद शिंदे यांच्या हस्ते करण्यात आले. यानंतर ‘सिद्धार्थ पुरस्कार’ वितरण करण्यात आले. समाज, शिक्षण, पत्रकारिता आणि प्रशासन क्षेत्रातील कर्तृत्वाला गौरविणाऱ्या या परिषदेत संविधान मूल्यांच्या जपणुकीचा संदेश प्रभावीपणे पोहोचविण्यात आला. कार्यक्रमाच्या आधी महिलांच्या हस्ते मनुस्मृतीचे प्रतिकात्मक प्रतींचे दहन करण्यात आले. प्रथम सत्रात प्रमुख वक्ते म्हणून ज्येष्ठ पत्रकार संजय आवटे यांनी ‘संविधानातील मूलभूत अधिकार, कर्तव्ये आणि सामाजिक न्यायाची आवश्यकता’, सर्वोच्च न्यायालयातील विधिज्ञ ॲड. महेंद्र कवचाळे यांनी ‘न्यायव्यवस्थेची भूमिका आणि संविधानिक मूल्यांचे संरक्षण’ यावर प्रकाश टाकला. या सत्रास प्रतिष्ठानचे अध्यक्ष डॉ. प्रमोद धिवार, सुनील लोणकर आदी मान्यवरांची प्रमुख उपस्थिती लाभली.