इंदापूर, ता. १५ : इंदापूर पोलिस ठाण्याच्या हद्दीतील वेगवेगळ्या गुन्ह्यांतील जप्त केलेला तब्बल ४५ लाख ४१ हजार ८० रुपयांचा गुटखा, तंबाखूमिश्रीत पदार्थ व इतर मुद्देमाल न्यायालयाच्या परवानगीने आणि अन्नभेसळ प्रशासनाच्या अधिकाऱ्यांच्या उपस्थितीत इंदापूर नगरपरिषदेच्या कचरा डेपोत नष्ट केला.
इंदापूरचे पोलिस निरीक्षक सूर्यकांत कोकणे यांच्या मार्गदर्शनाखाली व अन्नसुरक्षा अधिकारी शुभांगी कर्णिक यांच्या उपस्थितीत वरील कार्यवाही केली. मागील काही वर्षांमध्ये इंदापूर पोलिसांनी केलेल्या कारवाईत जप्त केलेला मुद्देमाल पोलिस ठाण्यात पडून होता. तो नागरिकांच्या आरोग्यास अपायकारक असल्याने त्याची विल्हेवाट लावण्याची आवश्यकता होती. त्यानुरूप न्यायालयाकडे परवानगी मागितल्यानंतर न्यायालयाने संबंधित मुद्देमाल नष्ट करण्याचे आदेश दिले. त्यानुसार सर्व मुद्देमाल इंदापूर नगरपरिषदेच्या कचरा डेपोत पूर्णपणे जाळून नष्ट केला.