इंदापूर, ता. ११ : शिक्षकेतर कर्मचाऱ्यांच्या पगारातील ६व्या व ७व्या वेतन आयोगातील त्रुटींसह इतर मागण्यांकडे सरकारकडून दुर्लक्ष केले जात असल्याच्या निषेधार्थ अनुदानित व विनाअनुदानित शाळेतील लिपिक प्रशिक्षणावर इंदापूर तालुक्यातील शिक्षकेत्तर कर्मचाऱ्यांचा बहिष्कार टाकला.
याबाबत माध्यमिक विभागाचे शिक्षणाधिकारी यांना देण्यात आलेल्या निवेदनात म्हटले आहे की, लिपिक बाधंवांवर ६व्या, व ७व्या आयोगापासून अन्याय होत आलेला आहे. खुल्लर समिती वेतन सुधारणा समितीच्या अहवालानुसार लिपिकास ६व्या आयोगानुसार १९००वरून २८०० व ७व्या आयोगानुसार एस ६वरून एस १० वेतनामध्ये बदल होणे गरजेचे होते. परंतु, तसे न करता शासन निर्णयामध्ये लिपिकाच्या मानधनात कोणताही बदल करण्याची गरज वाटत नाही, असा निर्णय दिलेला आहे. तसेच १०, २०, ३० ही आश्वासित प्रगती योजना लागू करण्याबाबत शिक्षकेत्तर कर्मचारी ग्रंथपाल यांना वेगळा निर्णय आणि लिपिकास वेगळा निर्णय असे का? प्रयोगशाळा साहय्यकास, परिचरास, वेगळा निर्णय आणि लिपिकास वेगळा निर्णय असे का?