इंदापूर, ता. ५ : उजनी धरणाच्या पाणी प्रदूषणाचा अभ्यास करण्यासाठी दिल्ली येथील विज्ञान आणि पर्यावरण केंद्राचे संशोधक रविवारी (ता.७) भिगवण, पळसदेव व इंदापूरला भेट देणार आहेत. दूषित पाण्याची पाहणी केल्यानंतर इंदापूर येथे बैठकीचे आयोजन केले आहे.
याबाबत अधिक माहिती अशी की, उजनीच्या दूषित पाणी प्रश्नाची दखल घेऊन १६ मे २०२५ रोजी आंतरराष्ट्रीय जलतज्ज्ञ डॉ.राजेंद्र सिंह यांनी दूषित पाणी प्रश्नाची माहिती घेत प्रदूषित पाण्याबाबत काळजी व्यक्त केली होती. यावेळी त्यांच्यासह जलबिरादरी महाराष्ट्र प्रांताध्यक्ष नरेंद्र चुघ, तेलंगणाचे माजीमंत्री व्ही. प्रकाश राव, आंध्र प्रदेशचे सत्यनारायण बोलशेट्टी, हैदराबादचे आकाश पांडे यांनी भिगवण या ठिकाणी भेट देत उजनी धरणातील प्रदूषित पाण्याची पाहणी केली होती. ही बाब गंभीर असल्याचे सांगत जलतज्ज्ञ डॉ.राजेंद्र सिंह यांनी यावर तीव्र आवाज उठवला जाईल, अशी घोषणा केली होती. कारण उजनीचे पाणी दूषित असून सदरचे पाणी माणसालाच नव्हे तर प्राण्यांना सुद्धा पिण्यायोग्य नाही. त्यामुळे अनेक जलचर यामध्ये मरून फुगून वर आल्याचे दिसत आहेत. म्हणजे हे पाणी पिल्याने अनेक स्वरूपाचे गंभीर आजार होतात. यावर स्पष्ट भूमिका घेऊन हा प्रश्न सोडवण्यासाठी संघर्ष केला जाईल, असे डॉ.राजेंद्र सिंह यांनी सांगितले होते.

दरम्यान, रविवारी (ता.०७) इंदापूर तालुक्यातील उजनी पट्ट्यातील भिगवन, पळसदेव व इंदापूर या ठिकाणी दिल्ली येथील विज्ञान आणि पर्यावरण केंद्राचे संशोधक भेट देणार असून त्यामध्ये स्वाती भाटिया, तारा तन्मय, जान्हवी खत्री आणि महाराष्ट्र बिरादारीचे अध्यक्ष नरेंद्र चूघ हे सहभागी असणार आहेत. हे संशोधक मच्छीमार, शेतकरी, नागरिक यांच्याशी संवाद साधत दूषित पाण्याचा मानव, पशू जलचरावर काय परिणाम होतो हे समजून घेणार आहेत.