इंदापूर, ता. ४ : छत्रपती शिवाजी महाराज यांचे आजोबा वीरश्री मालोजीराजे भोसले यांची इंदापूर येथील ऐतिहासिक समाधीस्थळ व गढीवर अतिक्रमण झाले आहे. ते हटविण्याची मागणी नागरिकांकडून करण्यात आली होती. मात्र, त्याकडे दुर्लक्ष होत असल्याचा आरोप करत त्याच्या निषेधार्थ सोमवारी (११ ऑगस्ट) इंदापूर तालुक्यातील हिंगणगाव पाटी येथील पुणे-सोलापूर महामार्गावर रास्ता रोको करण्यात येणार आहे. या वेळी आमदार महेश लांडगे, अनिल देवळेकर उपस्थितही राहणार आहेत.
इंदापूर शहरात छत्रपती शिवाजी महाराज यांचे आजोबा वीरश्री मालोजीराजे भोसले यांना १६०६च्या युद्धात वीरमरण आले. सध्या इतिहासाची साक्षीदार असलेली पुरातन गढी व समाधी इंदापूर येथे आहे. या पुरातन गढीच्या जीर्णोद्धारासाठी सरकारने भरीव निधी दिला आहे. वीरश्री मालोजीराजे यांचा इतिहास जपण्यासाठी गढीचे संवर्धन होणे गरजेचे आहे. सध्याच्या गढीच्या जागेवर अतिक्रमण झाले आहे. ते हटविण्यात यावे, गढीवरील मोजणी करून हद्द पक्की करावी, संरक्षक भिंतीचे काम करावे व वफ्क बोर्डाकडे बेकायदेशीरपणे दिलेला पीर दर्गा व जमीन परत देण्यात यावी आदी मागण्यांचे निवेदन सकल हिंदू समाजकडून पोलिस निरीक्षक सूर्यकांत कोकणे यांना देण्यात आले. या निवेदनावर महेश बोधले, किरण गानबोटे, उदय देशपांडे, प्रेमकुमार जगताप, राम आसबे, मयूर शिंदे, लक्ष्मण देवकाते, प्रशांत पाटील, तानाजी नरूटे, आबासाहेब राखुंडे, दत्ता पारेकर यांच्या सह्या आहेत.