इंदापूर, ता. १७ ः नगरपरिषद येथे थकीत घरपट्टीवरील व्याज व शास्तीच्या विरोधासह नागरिकांच्या विविध प्रश्नावर लक्ष वेधण्यासाठी १५ ऑगस्ट रोजी इंदापूर शहर नागरी संघर्ष समितीच्या वतीने जबाब दो आंदोलन करण्यात आले.
याबाबत नागरी संघर्ष समितीच्या वतीने दिलेल्या निवेदनानुसार, इंदापूर नगरपालिकेने १ एप्रिल २०१७ पासून घरपट्टीवरील आकारलेल्या २४ टक्के व्याज धोरणांच्या विरोधात इंदापूर नागरी संघर्ष समितीने केलेल्या आंदोलनाची दखल घेऊन महाराष्ट्र शासनाने अभय योजना लागू करण्याचा निर्णय घेतला. या निर्णयाची बारामती, जुन्नर, आळंदी नगरपालिकासह संपूर्ण महाराष्ट्रातील नगरपालिका, नगरपंचायतीने अंमलबजावणी केली. मात्र, इंदापूर नगरपालिका दबावापोटी नागरिकांचे व्याज माफ करत नाही. उतारे, बांधकाम परवानग्या, गुंठेवारी, बिगरशेती आदी कागदपत्रे मागत असताना सक्तीने बेकायदेशीर व्याज वसूल करत आहे. कारण विचारले असता नगरपालिकेच्या संगणकामध्ये अॅप दुरुस्त होत नसल्याचे सांगितले जाते. नगरपालिकेच्या चुकीची शिक्षा नागरिकांना होत आहे व शासनाकडे प्रलंबित असलेला १०० टक्के व्याजमाफीचा प्रस्ताव तातडीने मंजूर होण्यासाठी नगरपालिका प्रयत्न करीत नसल्याबाबत नगरपालिकेला जाब विचारण्यात आला. नागरिकांच्या संबंधित अन्य प्रश्नावर नगरपरिषदेचे मुख्याधिकारी रमेश ढगे यांच्यासमोर जोरदार घोषणाबाजी करत जाब विचारण्यात आला. यावेळी प्रदीप गारटकर यांच्यासह विविध राजकीय पक्षांचे आजी- माजी पदाधिकारी नगरसेवक नागरिक उपस्थित होते.
इंदापूर शहरातील थकीत घरपट्टीवरील व्याज व शास्तीचा प्रश्न, पिण्यासाठी तरंगवाडी तलावातील पाणी बंद करून उजनीचे पाणी दिले जात असल्याने वाढते आजार, ज्योतिबा मंदिराच्या बाजूला करण्यात आलेला कचरा डेपो, शहरातील गाळेधारकांच्या समस्या, घरकुलाबाबतचे प्रश्न यासह विविध २८ प्रश्नांकडे नगर परिषदेचे दुर्लक्ष असून स्वातंत्र्य दिनाच्या निमित्ताने प्रशासनाला जाब विचारण्यात आला. यावर प्रशासनाने तत्काळ कार्यवाही करावी अन्यथा आंदोलनाचे तीव्रता वाढवण्यात येईल.
प्रा. कृष्णा ताटे, प्रमुख, नागरी संघर्ष समिती, इंदापूर
इंदापूर नगर परिषदेने शासनाने निर्गमित केलेल्या अभय योजनेच्या अंमलबजावणी बाबतचा प्रस्ताव वरिष्ठ कार्यालयाकडे पाठवला असून, त्यांच्याकडून अद्यापही मान्यता मिळालेली नाही. याबाबत नगरपालिकेने पत्रव्यवहार केला असून, वरिष्ठ कार्यालयाकडून अभय योजनेच्या अंमलबजावणी बाबत मान्यता मिळाल्यानंतर तत्काळ कार्यवाही करण्यात येईल.
- रमेश ढगे, मुख्याधिकारी, इंदापूर नगरपरिषद
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.