इंदापूर ता. ४ : भारतीय नौदलामध्ये १५ वर्षे उल्लेखनीय सेवा करून निवृत्त झालेले इंदापूर येथील जवान अमोल मुरलीधर पोतदार यांच्या सेवापूर्तीनिमित्त शहरात जल्लोषात मिरवणूक काढली. यावेळी ‘जय जवान जय किसान, भारत माता की जय’ च्या घोषणांनी वातावरण दणाणून गेले होते.
गुरुवारी (ता. ४) सकाळी शहरातून भव्य तिरंगा फेरीचे आयोजन केले होते. देशभक्तिपर गीतांच्या निनादात व हातात तिरंगा घेऊन सजवलेल्या गाडीतून पोतदार यांची मिरवणूक काढली. यामध्ये आजी-माजी सैनिक, सामाजिक कार्यकर्ते, नागरिक, महिला सहभागी झाल्या होत्या. यावेळी विविध मान्यवरांच्या उपस्थितीत पोतदार यांना शाल, श्रीफळ, पुष्पगुच्छ व स्मृतिचिन्ह देऊन गौरविण्यात आले.
दरम्यान, अमोल पोतदार यांनी नौदलात २०१० मध्ये ओडिशा येथे प्रशिक्षण घेत देशसेवेस प्रारंभ केला. त्यानंतर यशस्वीरीत्या नौदलात तब्बल १५ वर्षे सेवा बजावत देशाच्या संरक्षणात मोलाचा वाटा उचलला. निवृत्तीनंतर आपल्या मातृभूमीत परतल्यावर जय हिंद आजी माजी सैनिक संघटना व इंदापूरकर यांच्या वतीने त्यांचे स्वागत करून त्यांचा सन्मान केला. या सोहळ्याचे आयोजन गिरिजाबाई पोतदार व मुरलीधर पोतदार, महेश पोतदार आदींनी केले.