इंदापूर, ता. १८ ः कळाशी (ता. इंदापूर) येथून एक गावठी अग्निशस्त्र व दोन जिवंत काडतूस ताब्यात घेण्यात आले आहे. याप्रकरणी दोघांविरोधात इंदापूर पोलिस ठाण्यात गुन्हा दाखल करण्यात आला आहे.
पोलिस अधिक्षक संदिपसिंह गिल यांच्या आदेशाने निवडणुकीच्या काळात अग्निशस्त्र बाळगणाऱ्या व्यक्तींवर, तसेच रेकॉर्डवरील गुन्हेगारांवर करडी नजर ठेवण्याबाबत सूचना करण्यात आली आहे. त्यानुरूप सोमवारी (ता. १७) इंदापूर पोलिस ठाण्याच्या गुन्हे शोध पथकाला मिळालेल्या माहितीवरून व पोलिस निरीक्षक विलास नाळे यांच्या आदेशाने स्वप्नील फकीर भोई (वय २२, रा. कळाशी, ता. इंदापूर) यास ताब्यात घेऊन सखोल चौकशी केली असता, त्याच्याकडून ५५ हजार रुपये किमतीचे मॅगझीन, एक गावठी अग्निशस्त्र व दोन जिवंत काडतूस जप्त करण्यात आले. या प्रकरणामध्ये त्याच्या साथीदार रणजित नवनाथ शिंदे (रा. कळाशी, ता. इंदापूर) याचाही समावेश आहे.
तसेच, सखोल तपासाअंती आणखी आरोपी वाढण्याची शक्यता आहे. दरम्यान इंदापूर पोलिस ठाण्याचे पोलिस उपनिरीक्षक अजित बिरादार व त्यांच्या पथकातील पोलिस हवालदार सलमान खान, पोलिस शिपाई लक्ष्मण सूर्यवंशी, तुषार चव्हाण, अंकुश माने, गणेश डेरे, विनोद लोखंडे, सूरज गुंजाळ, योगेश कर्चे, नंदू जाधव यांनी ही कारवाई केली.