इंदापूर ता. ३० : येथील शहा संस्कृतिक भवनामध्ये शुक्रवार (ता. २८) ते शनिवार (ता. २९) या कालावधीत शालेय राज्यस्तरीय कुराश स्पर्धा झाल्या. यामध्ये राज्यभरातील ३९२ खेळाडूंनी सहभाग घेतला. या स्पर्धेत पुणे विभागाने आपले वर्चस्व कायम राखले. यामध्ये विजेते खेळाडू राष्ट्रीय स्पर्धेत प्रतिनिधित्व करणार आहेत.
क्रीडा व युवक सेवा संचालनालय महाराष्ट्र राज्य, जिल्हा क्रीडा अधिकारी कार्यालय पुणे, पुणे जिल्हा कुराश असोसिएशन व येथील शहा ग्लोबल स्कूल यांच्या वतीने स्पर्धेचे आयोजन करण्यात आले होते. या स्पर्धेचे उद्‍घाटन रोटरी क्लब ऑफ इंदापूरचे अध्यक्ष नितीन शहा, क्रीडा अधिकारी शिवाजी कोळी यांच्या हस्ते झाले. यावेळी भीमाशंकर जाधव, कुराश असोसिएशन ऑफ महाराष्ट्राचे अध्यक्ष अंकुश नागर, सचिव शिवाजी साळुंखे, क्रॉस असोसिएशन ऑफ महाराष्ट्राचे फाउंडर संजय धोपावकर, तांत्रिक सचिव दत्तात्रेय व्यवहारे आदी उपस्थित होते. शहा ग्लोबल स्कूलच्या वतीने स्पर्धेचे आयोजन केले.
दरम्यान, उत्तर प्रदेश येथील सहारनपूर या ठिकाणी होणाऱ्या स्पर्धेत पुणे विभागाचे ४८ खेळाडू चार टीम मॅनेजर्स व चार कोच असा संघ महाराष्ट्र राज्यातून सहभागी होणार आहे. या स्पर्धा १५ ते २२ डिसेंबर या कालावधीत पार पडणार आहेत.

Media Ids : IND25B06730