इंदापूर, ता. ३ : येथे नगराध्यक्ष व २० नगरसेवकपदांसाठी झालेल्या निवडणुकीत महिलांनी मतदानात आघाडी घेत पुरुषांपेक्षा अधिक टक्केवारीने सहभाग नोंदवला. एकूण ७९.८९ टक्के मतदानाची नोंद झाली असून, त्यामध्ये महिलांचे प्रमाण सर्वाधिक राहिले. त्यामुळे अंतिम निकालावर महिलांच्या मतांचा निर्णायक प्रभाव पडणार आहे.
इंदापूर शहरात नगर परिषदेसाठी एकूण मतदारसंख्या २४,८२९ होती. यामध्ये पुरुष १२,१८८, महिला १२,६३४ व इतर ७ यांचा समावेश होता. यापैकी एकूण १९,८३७ मतदान झाले. यामध्ये पुरुष ९,७५०, तर महिला १०,०८४ व इतर ३ मतदारांनी मतदानाचा हक्क बजावला. मतदानाची एकूण टक्केवारी ७९.८९ टक्के होती. महिलांचे मतदान पुरुषांपेक्षा तब्बल ३३४ मतांनी जास्त असून, ही आघाडी अंतिम निकालात निर्णायक ठरणार आहे. ‘महिला कोणाच्या पाठीशी आहेत?’ हा प्रश्न आता राजकीय वर्तुळात चर्चेचा विषय ठरला आहे. त्यावरच गुलाल कोणाचा, हे महिलांवर अवलंबून असणार आहे.