इंदापूर, ता. २० ः इंदापूर येथील विद्या प्रतिष्ठानच्या इंग्लिश मीडियम स्कूलचा वार्षिक स्नेहसंमेलन सोहळा उत्साहात पार पडला. यावेळी विद्यार्थ्यांच्या कलाविष्कारातून साकारलेल्या शारीरिक कसरतींनी उपस्थितांची मने जिंकली. या प्रसंगी विविध पुरस्कारांचे वितरणही करण्यात आले.
यंदाची कार्यक्रम संकल्पना “हेल्दी बॉडी– हेल्दी माईंड” अशी होती. यावेळी प्रमुख पाहुणे म्हणून कुस्ती प्रशिक्षक सागर मारकड उपस्थित होते. विद्यालयाच्या प्राचार्या डॉ. ज्योती जगताप, असोसिएशनचे उपाध्यक्ष नंदराज चंदनशिवे, निलोफर शेख, पॉलिटेक्निक महाविद्यालयाचे प्राचार्य डॉ. सुजय देशपांडे, वाणिज्य व विज्ञान महाविद्यालयाचे प्राचार्य डॉ. बालकृष्ण संदिकर यांच्यासह शाळेतील विविध समिती प्रमुख, पालक उपस्थित होते.
शिक्षिका राणी पवार यांनी सर्व प्रेक्षक, पाहुणे व उपस्थितांचे स्वागत केले. अनुराधा इनामदार यांनी प्रमुख पाहुण्यांची ओळख करून दिली. त्याचबरोबर विद्यालयाच्या प्राचार्य डॉ. ज्योती जगताप यांनी वार्षिक अहवाल व विद्यार्थ्यांची वाटचाल सादर केली. यानंतर प्रमुख पाहुण्यांनी आपल्या भाषणात नियमित व्यायाम, शिस्त आणि सकारात्मक विचारसरणी यांचे महत्त्व सांगून विद्यार्थ्यांना क्रीडा क्षेत्रात प्रगती करण्यासाठी प्रेरित केले.
विद्यार्थ्यांनी मिळविलेल्या खेळातील व शालेय अभ्यासातील यशाबद्दल पाहुण्यांनी मनापासून कौतुक केले. यावेळी विद्यार्थ्यांनी पी. टी. ड्रिल्स, योगासने, सामूहिक व्यायाम, तालबद्ध हालचाली व विविध शारीरिक प्रात्यक्षिके जसे की, पोम पोम, टाळ, रिंग, फ्लोरा रिंग्स, लेझीम, ढोलताशा पथक, स्टूल्स व रिबीन्स यांच्या मदतीने मनोरंजक क्रीडाकला सादर केल्या. या सर्व सादरीकरणातून शारीरिक तंदुरुस्ती व मानसिक आरोग्य यांचे महत्त्व प्रभावीपणे अधोरेखित करण्यात आले. येणाऱ्या नवीन वर्षात प्रत्येकाने आपल्या चांगल्या आरोग्याचा व मानसिक शांततेचा संकल्प घेऊन कार्यक्रमाची सांगता झाली. सई कदम, समता पाटील, समीक्षा फलफले, तनिष्का पाटील यांनी कार्यक्रमाचे सूत्रसंचालन केले. तर, शिक्षिका ज्योती भोसले यांनी आभार मानले.