इंदापूर, ता. २२ : महाराष्ट्र राज्य परीक्षा परिषदेतर्फे घेण्यात आलेल्या इयत्ता पाचवी आणि आठवीच्या शिष्यवृत्ती परीक्षा रविवार (ता. २२) झाली. यामध्ये इंदापूर तालुक्यातील विविध परीक्षा केंद्रांवर इयत्ता पाचवीच्या ३०१२ व इयत्ता आठवीच्या १९१४, अशा एकूण ४ हजार ९२६ विद्यार्थ्यांनी परीक्षा दिल्याची माहिती इंदापूर पंचायत समितीचे प्रभारी गटशिक्षणाधिकारी नीलेश गवळी यांनी दिली.
इंदापूर तालुक्यातून पूर्व उच्च प्राथमिक शिष्यवृत्ती परीक्षेसाठी (इयत्ता पाचवी) तालुक्यातील विविध शाळांमधील ३०६२ विद्यार्थ्यांनी नोंदणी केली होती. त्यापैकी ५८ विद्यार्थी गैरहजर होते. तर ३००८ विद्यार्थी आणि ऐनवेळी प्रविष्ट झालेल्या ४ अशा एकूण ३०१२ विद्यार्थ्यांनी परीक्षा केंद्रावर परीक्षा दिली. पूर्व माध्यमिक शिष्यवृत्ती परीक्षेसाठी (इयत्ता आठवी) तालुक्यातील विविध शाळांमधून १९५१ विद्यार्थ्यांनी नोंदणी केली होती. यापैकी ३७ विद्यार्थी गैरहजर होते. तर १९१४ विद्यार्थ्यांनी परीक्षा दिली. या परीक्षेसाठी इंदापूर येथील श्री नारायणदास रामदास हायस्कूल येथील परीक्षा केंद्रावर केंद्र संचालक म्हणून मुख्याध्यापक संजय सोरटे तर उपकेंद्र संचालक म्हणून मनीषा कांबळे यांनी काम पाहिले.