इंदापूर : येथील महाराष्ट्र राज्य परिवहन महामंडळाच्या बस स्थानकावर मराठी भाषा गौरव दिन प्रवाशांचे गुलाबपुष्प देऊन विविध उपक्रमांनी उत्साहात साजरा करण्यात आला.
या कार्यक्रमाचे प्रमुख पाहुणे म्हणून लोणी देवकरचे सरपंच कालिदास देवकर उपस्थित होते. त्यांचा सत्कार सहायक वाहतूक अधीक्षक संजय वायदंडे यांच्या हस्ते करण्यात आला. यावेळी यानंतर बसस्थानकावर उपस्थित प्रवाशांना पुष्पगुच्छ देऊन साखर व पेढे वाटण्यात आले. तसेच बसमधील प्रवाशांचेही पुष्पगुच्छ देऊन स्वागत करण्यात आले.
या कार्यक्रमासाठी लिपिक प्रिया बनसोडे यांनी काढलेली आकर्षक व भव्य रांगोळी सर्वांचे लक्ष वेधून घेत होती. वाहक पूनम ठोसरे यांनी सूत्रसंचालन केले.
या कार्यक्रमास वाहतूक निरीक्षक दत्तात्रेय भोसले, लेखाकार रवींद्र डोके तसेच आगारातील कर्मचारी मोठ्या संख्येने उपस्थित होते.