इंदापूर, ता. २७ ः इंदापूर शहरात शिवभक्तांच्या उपस्थितीत शंभू महादेवाच्या कावडीची महाआरती उत्साहात पार पडली. शहरातील ऐतिहासिक व मानाची समजली जाणारी पांडुरंग (तात्या) शिंदे बंधूंची कावड सोहळा यंदाही दिमाखात साजरा झाला.
शिंदे बंधूंची कावड ही इंदापूरच्या धार्मिक व सांस्कृतिक परंपरेचा अविभाज्य भाग असून, ती अत्यंत मानाची मानली जाते. यंदा या सोहळ्यावेळी पारंपरिक ढोल-ताशा, हलगी यांच्या गजरात परिसर दणाणून गेला होता. भाविकांच्या जयघोषामुळे वातावरण शिवमय झाले होते. भाविकांनी कावडीच्या दर्शनासाठी गर्दी केली होती.
या कार्यक्रमाला कर्नाटक येथील बालेवाडी मठाचे पीरयोगी सिंगनाथाजी महाराज यांची प्रमुख उपस्थिती लाभली. त्यांनी कावडीचे दर्शन घेऊन विधीपूर्वक महाआरती केली. महाआरतीनंतर भाविकांसाठी महाप्रसादाचे आयोजन केले होते. कार्यक्रमाची व्यवस्था पांडुरंग शिंदे बंधू व स्थानिक कार्यकर्त्यांनी सांभाळली.