इंदापूर, ता. ११ ः येथील विद्या प्रतिष्ठान संस्थेच्या पॉलिटेक्निक महाविद्यालयामध्ये वार्षिक पारितोषिक वितरण कार्यक्रम पार पडला. या वेळी क्रीडा क्षेत्रातील विभाग स्तरावरील विजेते, विविध सांस्कृतिक कार्यक्रमांमध्ये महाविद्यालयीन स्तरावरील स्पर्धांमध्ये विजय मिळविणाऱ्या विद्यार्थ्यांचा गौरव करण्यात आला. तसेच, प्रत्येक विभागातील विद्यार्थ्याला ‘स्टुडंट ऑफ द इयर’ हा पुरस्कार प्रदान करण्यात आला. वैभव काशीद, सुरज भोसले, मयुरी पिसाळ, सिध्दी रोकडे, गितांजली भगत यांचा त्यामध्ये समावेश होता.
या प्रसंगी मेकॅनिकल इंजिनिअरिंग विभागाला ‘बेस्ट परफॉर्मिंग डिपार्टमेंट ऑफ द इयर’ या पुरस्काराने सन्मानित करण्यात आले. प्राची भांडारे हिला संपूर्ण संस्थेमधून ‘इन्स्टिट्यूट लेव्हल बेस्ट आऊटगोइंग स्टुडंट’ म्हणून गौरविण्यात आले. या कार्यक्रमासाठी इंदापूर पंचायत समितीचे गटविकास अधिकारी सचिन खुडे, अनंतराव पवार इंजिनिअरिंग कॉलेजचे मेकॅनिकल अभियांत्रिकीचे विभागप्रमुख प्रा. कोंढाळकर, राहुल मखरे आदी उपस्थित होते. महाविद्यालयाचे प्राचार्य डॉ. सुजय देशपांडे यांच्या मार्गदर्शनाखाली आयोजित या कार्यक्रमाचे सूत्रसंचालन प्रा. सोनाली काळे यांनी केले. प्रा. सोमनाथ चिकणे यांनी प्रास्ताविक केले. तर, प्रा. दिनेश सावंत यांनी आभार मानले. प्रा. लक्ष्मीकांत लाकाळ, प्रा. डॉ. संजय कदम यांनी समन्वयक म्हणून काम पाहिले.