इंदापूर, ता. १२ : शहरात महात्मा फुले यांच्या जयंतीनिमित्त विविध कार्यक्रमांचे आयोजन केले होते. शहरातील महात्मा फुले यांच्या पुतळ्यासह विविध चौकांमध्ये मान्यवरांनी अभिवादन करत कृतज्ञता व्यक्त केली. सकाळी दुचाकी रॅली आणि सायंकाळी आकर्षक मिरवणूक काढण्यात आली. मिरवणुकीत कृषिमंत्री दत्तात्रेय भरणे यांनी डीजेच्या तालावर ठेका धरत सहभाग नोंदवला. सकाळी सावतामाळीनगर येथून मोटारसायकल रॅलीला प्रारंभ झाला. युवकांनी हातात निळे-पिवळे झेंडे घेत आणि महापुरुषांच्या पुतळ्यांना अभिवादन करत शहरातून संचलन केले. सायंकाळी निघालेल्या मुख्य मिरवणुकीत पिवळे फेटे परिधान केलेल्या महिलांचा सहभाग लक्षवेधी ठरला. यावेळी नगराध्यक्ष भरत शहा, पुणे जिल्हा परिषदेचे माजी सभापती प्रवीण माने, प्रदीप गारटकर यांच्यासह विविध आजी-माजी पदाधिकाऱ्यांनी महात्मा फुले यांच्या पुतळ्यास पुष्पहार अर्पण करून कृतज्ञता व्यक्त केली. दिवसभर शहरात सामाजिक एकात्मतेचे आणि उत्साहाचे वातावरण होते.