इंदापूर, ता. १६ : शेटफळ हवेली (ता. इंदापूर) येथील तलावातून अनधिकृतपणे मुरूम उत्खनन करून चोरी केल्याप्रकरणी दोघांविरुद्ध इंदापूर पोलिस ठाण्यात गुन्हा दाखल करण्यात आला आहे. महसूल विभागाने ही कारवाई केली आहे. मदन अरुण काळे व गच्चू ऊर्फ संदीप चव्हाण अशी गुन्हा दाखल झालेल्यांची नावे आहेत. ग्राम महसूल अधिकारी धनंजय तानाजी हांडे (वय ५४) यांनी याप्रकरणी फिर्याद दिली. फिर्यादीनुसार, रविवारी (ता. १२) दुपारी साडेदोनच्या सुमारास शेटफळ हवेली गावच्या हद्दीतील तलाव परिसरातून आरोपींनी आर्थिक फायद्यासाठी बेकायदेशीरपणे मुरूम उत्खनन करून तो चोरून नेला. सहाय्यक फौजदार प्रकाश माने या प्रकरणाचा पुढील तपास करत आहेत.