जेजुरी, ता. ३ : जिल्हा परिषद शाळेतील मुलींना शिक्षणाप्रति प्रोत्साहन देण्यासाठी मुख्य कार्यकारी अधिकारी गजानन पाटील यांच्या संकल्पनेतून ग्रामीण भागातील गरजू विद्यार्थिनींसाठी ‘सायकल बँक’ हा उपक्रम राबविण्यात येणार आहे. मुलींचे शिक्षण टिकवण्यासाठी हा प्रयत्न असल्याचे पुरंदरच्या गटविकास अधिकारी प्रणोती श्रीश्रीमाळ यांनी सांगितले.
जिल्हा परिषदेच्या शाळांमध्ये इयत्ता ५ वी ते ८ वीमध्ये शिक्षण घेणाऱ्या मुलींना घरापासून २-३ किलोमीटर पायपीट करत शाळा गाठावे लागते. शाळेस जाण्यास साधन नसल्याने त्यांच्या शिक्षणात अडथळा येतो. या अडचणीवर मात करण्यासाठी व मुलींना शाळेपर्यंत जाण्यासाठी ‘सायकल बँक’ उपक्रम हाती घेतला आहे. त्यानुसार गावातील दानशूर व्यक्ती, पालक, शिक्षक, तरुणमंडळ, समाजसेवक, उद्योगपती, शासकीय अधिकारी, कर्मचारी, विविध संस्था, संघटना, मंडळ यांनी गावातील जिल्हा परिषद शाळेत १५ ऑगस्ट म्हणजेच स्वतंत्र दिन कार्यक्रमात सायकल दान करण्याचे आवाहन करण्यात आले आहे. तसेच, पंकज पाटील ९४०४४२१४२७ यांचेशी संपर्क करता येणार आहे, असे पुरंदरचे गटशिक्षणाधिकारी वैभव डुबल यांनी केले.

‘सायकल बँक’ उपक्रमांतर्गत जमा होणाऱ्या सायकली जिल्हा परिषद शाळेतील शिक्षण पूर्ण होईपर्यंत मुलींना वापरता येतील. नंतर त्या ‘सायकल बँके’त जमा करून पुढील वर्षी नव्याने ५ वीत येणाऱ्या मुलींना उपलब्ध करून दिल्या जाणार आहेत. त्यामुळे मुलींचा शाळेपर्यंतचा प्रवास सुखकर होईल.
- गजानन पाटील, मुख्य कार्यकारी अधिकारी, पुणे जिल्हा परिषद