जेजुरी, ता. १७ ः जेजुरीत वर्षातून दहा ते बारा यात्रा भरतात. मात्र गावची ग्रामदैवताची जत्राच होत नव्हती. यंदा मात्र ग्रामस्थांनी पुढाकार घेतला असून ग्रामदेवता जानाई देवीची जत्रा दीडशे वर्षानंतर होणार आहे. चैत्र महिन्यातील अष्टमीला दहा एप्रिलला मुख्य जत्रा साजरी करण्याचा निर्णय ग्रामस्थांनी घेतला आहे.
जेजुरीत बारा यात्रा भरतात. नेहमी भरणाऱ्या यात्रांमुळे ग्रामदैवत जानाई देवीची यात्रा काळाच्या ओघात मागे पडली. आता दीडशे वर्षानंतर
पुन्हा जत्रा भरणार असल्याने जेजुरी व पंचक्रोशीतील नागरिकांत उत्साहाचे वातावरण निर्माण झाले आहे.
जेजुरी गडाच्या पायथ्याशी असणाऱ्या होळकर तलावा काठी ग्रामदैवत जानाई देवीचे मंदिर आहे. लोकवर्गणी, देवसंस्थान व विविध संस्थानच्या वतीने सुमारे चार कोटी रुपये खर्च करून नव्याने मंदिर उभे करण्यात आले आहे. गेल्यावर्षी या मंदिराचे कलशारोहण करण्यात आले.
जानाई देवीचे मूळ स्थान सातारा जिल्ह्यातील पाटण तालुक्यातील निवकणे येथील डोंगर खोऱ्यात असून दरवर्षी जेजुरीतून देवीची पालखी सोहळा निवकणे येथे जातो. जेजुरीत असंख्य भाविक तेथे यात्रेसाठी जातात. मात्र ग्रामदेवतेची जत्रा जेजुरीत साजरी होत नसल्याने ही यात्रा साजरी करण्याचा निर्णय ग्रामस्थांनी घेतला.
या जत्रेच्या नियोजनाच्या निमित्ताने जानाई देवी मंदिरात ग्रामस्थांच्या बैठकीचे नियोजन करण्यात आले होते. यावेळी जेजुरी नगरपरिषदेचे नगराध्यक्ष जयदीप बारभाई, जेजुरी देवसंस्थानचे प्रमुख विश्वस्त मंगेश घोणे, ग्रामदैवत जानाई देवी मंदिर ट्रस्टचे अध्यक्ष सुधीर गोडसे, श्री खंडोबा पालखी सोहळा समिती खांदेकरी मानकरी मंडळाचे अध्यक्ष जालिंदर खोमणे, पदाधिकारी राजेंद्र पेशवे, गणेश आगलावे, छबन कुदळे, रोहिदास माळवदकर, संतोष खोमणे, विजय झगडे, कृष्णा कुदळे, पंडित हरपळे, माणिक पवार, रामदास माळवदकर, माऊली खोमणे, सतीश घाडगे, आप्पासाहेब बारभाई आदी उपस्थित होते.
दहा एप्रिल दरम्यान तीन दिवसीय जत्रा उत्सवात विविध धार्मिक व सांस्कृतिक कार्यक्रम होणार असून या नियोजनासाठी यात्रा समितीची स्थापना करण्यात येणार असल्याचे सुधीर गोडसे यांनी सांगितले. यात्रा समिती यात्रेचे नियोजन करणार आहे.