जुन्नर, ता. ७ : जुन्नर नगर परिषदेने शहरातील करदात्या नागरिकांच्या मालमत्तांवर लादलेल्या वाढीव कर आकारणीच्या विरोधात आज नागरिक, व्यापारी, गृहनिर्माण संस्था यांच्यावतीने राष्ट्रवादी काँग्रेस पक्षाच्यावतीने नगर परिषद कार्यालयावर धडक मोर्चाचे आयोजन केले असल्याचे शहर अध्यक्ष धनराज खोत यांनी दिली.
चतुर्थ वार्षिक कर आकारणीत सर्व सामान्य नागरिकांवर मोठ्या प्रमाणात वाढीव कर आकारणी केली असल्याने मालमत्ता धारकांमध्ये मोठ्या प्रमाणात नाराजीची भावना आहे. शेकडो मालमत्ताधारकांनी याबाबतच्या हरकती लेखी स्वरूपात नगर परिषद कार्यालयात दाखल केल्या आहेत.
चतुर्थ वार्षिक कर आकारणी करताना नगर पालिकेने एका प्रशासकीय ठरावानुसार अमरावती येथील एजन्सीला सर्वेक्षण काम सोपविले मात्र संबंधित एजन्सीकडून अनेक चुका झाल्याने त्याचा भुर्दंड नागरिकांना बसला आहे. यामुळे पूर्वीची आकारणी कायम ठेवावी अशी नागरिकांची मागणी आहे.