जुन्नर, ता. १० : वडज (ता. जुन्नर) येथे स्वाभिमानी शेतकरी संघटना व मनसे शेतकरी सेनेच्या वतीने बिबट प्रश्नासाठी सुरू केलेले वनवास आंदोलन  दोन दिवसानंतर (ता. ९ सायंकाळी) स्थगित केले.
आमदार शरद सोनवणे व वन अधिकाऱ्यांनी आंदोलकांची भेट घेऊन चर्चा केल्यानंतर हा निर्णय घेण्यात आला. यावेळी वडजचे सरपंच सुनील चव्हाण, जुन्नरचे वनपरिक्षेत्र अधिकारी प्रदीप चव्हाण, सहाय्यक वन संरक्षक स्मिता राजहंस, वनपाल नितीन विधाटे, पोलिस निरीक्षक किरण अवचर, सहाय्यक फौजदार अनिल लोहकरे व ग्रामस्थ  उपस्थित होते.
वडज व हिवरेतर्फे नारायणगाव येथील बिबट हल्ल्यातील जखमींना त्वरित आर्थिक मदत द्यावी, तसेच वडजच्या चव्हाण कुटुंबाला राहण्यासाठी घरकुल मिळावे, जुन्नर तालुका बिबटमुक्त करण्यासाठी मुख्यमंत्र्यांसमवेत शेतकरी संघटनेची बैठक घ्यावी. शेतकऱ्यांना दिवसा आठ तास थ्री फेज वीज मिळावी, आदी प्रमुख मागण्या यावेळी मंजूर केल्याचे आंदोलक  प्रमोद खांडगे पाटील व योगेश तोडकर यांनी सांगितले.