जुन्नर, ता. ६ : पशुसंवर्धन विभागाच्या अंतर्गत येणाऱ्या विविध वैयक्तिक लाभाच्या योजनांसाठी पात्र इच्छुकांनी अर्ज करावेत, असे आवाहन जुन्नर तालुका पंचायत समितीचे पशुधन विकास अधिकारी सुनील भंडलकर यांनी केले आहे.
शासनाच्या नावीन्यपूर्ण राज्यस्तरीय व जिल्हास्तरीय योजना अंतर्गत दुधाळ गायी- म्हशींचे वाटप करणे, शेळी- मेंढी गट वाटप करणे, एक हजार मांसल कुक्कुट पक्षांसाठी निवारा शेड उभारणीसाठी अर्थसाहाय्य देणे तसेच, शंभर कुक्कुट पिल्लांचे वाटप आदी योजना २०२५ -२६ साठी ऑनलाइन पद्धतीने लाभार्थी निवड प्रक्रिया राबविली जाणार आहे.
तालुक्यातील पशुपालक- शेतकरी, सुशिक्षित बेरोजगार व महिलांनी या योजनांचा लाभ घेण्यासाठी ऑनलाइन अर्ज करणे आवश्यक आहे. अर्ज करण्यासाठी १ जून ही अंतिम मुदत निश्चित केली आहे. याबाबतच्या अधिक माहितीसाठी जवळचा पशुवैद्यकीय दवाखाना किंवा जुन्नर पंचायत समितीच्या पशुसंवर्धन विभागात संपर्क साधावा, असे कळविण्यात आले आहे.