जुन्नर, ता.३० :कृषी विभागाने जुन्नर तालुक्याच्या खरीप हंगामाचे नियोजन केले आहे. जुन्नर तालुक्यासाठी एकूण ३४ हजार २१७ टन रासायनिक खतांची मागणी करण्यात आली आहे तसेच एकूण १३ हजार ५०४ क्विंटल बियाण्याची मागणी करण्यात आलेली आहे. मे अखेर एकूण ७ हजार ५५२ टन खताचा पुरवठा होणे अपेक्षित आहे, अशी माहिती गुण नियंत्रण निरीक्षक तथा जुन्नर तालुका पंचायत समितीचे कृषी अधिकारी नीलेश बुधवंत यांनी दिली.
जुन्नर तालुक्यात गुरुवारी (ता.२९) अखेर सरळ व संयुक्त खते मिळून ९ हजार ८०३ टन खतांचा साठा उपलब्ध आहे. मे अखेर सर्व खतांचा मुबलक प्रमाणात साठा उपलब्ध होईल तसेच आजअखेर ३ हजार ५०० क्विंटल बियाण्याचा पुरवठा झाला आहे .यात खरीप हंगामातील भात, सोयाबीन, भुईमूग व मका तसेच कडधान्य या प्रमुख पिकांची बियाणे आहेत.बियाणांचा मागणीप्रमाणे पुरवठा होणार असून प्रामुख्याने महाबीज व खासगी कंपन्यामार्फत बियाण्यांचा पुरवठा केला जातो.निविष्ठांच्या उपलब्धतेमध्ये कोणत्याही प्रकारची अडचण येणार नाही शेतकऱ्यांना वेळेवर मुबलक व चांगल्या दर्जाचे खते व बियाणे मिळण्यासाठी कृषी विभाग नेहमीच प्रयत्नशील असतो असे बुधवंत यांनी सांगितले.
जुन्नर तालुक्यासाठी युरिया व डीएपी खताचा संरक्षित साठा करण्याचे नियोजन केले केलेले असून युरिया खताचा ६०० मेट्रिक टन व डीएपी ८० टन साठा बफर स्टॉक मध्ये ठेवण्याचे नियोजन केलेले आहे.

खरिपाचे प्रमुख पिकाखालील अपेक्षित पेरणी क्षेत्र(हेक्टर) पुढील : भात-१३,९९२, सोयाबीन-१४,५६०, मका-२,१२२, उडीद-५००, तूर-३७१, बाजरी-६१० व इतर पिके.
खरीप हंगामासाठी प्रमुख खतांची मागणी टनामध्ये खालीलप्रमाणे : युरिया-१४,१००, डीएपी-२,९८५, एमओपी-१,१४२, सिंगल सुपर फॉस्फेट-३,०७५, संयुक्त खाते-१२,९१५