जुन्नर, ता. १ : श्री विघ्नहर सहकारी साखर कारखान्याने २०२६-२७ गळीत हंगामासाठी पुरेसा ऊस उपलब्ध व्हावा यासाठी लागवड हंगाम २०२५-२६ मधील ऊस लागवड धोरण एक जूनपासून राबविण्यात येणार आहे, अशी माहिती अध्यक्ष सत्यशील शेरकर यांनी दिली.
ते म्हणाले की, आडसाली ऊस लागवडीसाठी १ जून ते ३१ ऑगस्ट कालावधीत को.८६०३२, को.एम.०२६५, पीडीएन. १५०१२, कोव्हिएसआय-१८१२१,पीडीएन.११०८२, पीडीएन. १५००६ व पीडीएन. १३००७ या ऊस जातींच्या लागवडीस परवानगी दिली आहे. पूर्वहंगामी लागवडीसाठी एक सप्टेंबर ते ३० नोव्हेंबरपर्यंतच्या कालावधीत को.८६०३२, को.एम.०२६५, पीडीएन.१५०१२, कोव्हिएसआय-१८१२१, पीडीएन.११०८२, पीडीएन.१५००६, पीडीएन.१३००७, को-९०५७ व व्हीएसआय-०८००५ या ऊस जातींच्या लागवडीस परवानगी देण्यात आली आहे.
सुरु हंगामासाठी एक डिसेंबर ते मार्च २६ पर्यंत को.८६०३२, को.एम.०२६५,पीडीएन.२५०१२, कोव्हिएसआय-१८१२१, पीडीएन.११०८२, पीडीएन.१५००६,पीडीएन.१३००७,को-९०५७ व व्हीएसआय-०८००५ ऊस जातींच्या लागवडीस परवानगी दिली आहे. यातील डिंसेंबर महिन्यात कोएम-०२६५ ऊस जातीच्या लागवडीस परवानगी देण्यात आली आहे. कारखाना कार्यक्षेत्रामधील सर्व सभासद व ऊस उत्पादकांनी वरील प्रमाणे उपलब्धतेनुसार वरील ऊस जातींचे बेणे वाटप करण्यात येणार आहे.

कारखाना कार्यक्षेत्रात गाळपासाठी पुरेसा ऊस उपलब्ध व्हावा म्हणून ऊस विकास अभियान मोठ्या प्रमाणावर राबविले जाते. त्या अंतर्गत ऊस उत्पादक शेतकऱ्यांना मागणीनुसार उधारी तत्त्वावर ऊस बेणे व ऊस रोपांचा पुरवठा केला जातो. नोंद झाल्यानंतर प्रतिएकरी ऊस उत्पादन वाढीसाठी प्रत्यक्ष बांधावर जावून शेतकऱ्यांना मार्गदर्शन केले जाते. शेतकऱ्यांना जिवाणू खतांचा तसेच हिरवळीचे खतासाठी ताग बियाण्यांचा पुरवठा केला जातो. कारखान्यामार्फत ठिबक सिंचन योजना राबविण्यात येते.

शेतकऱ्यांना ऊस पिकातील नवनवीन संशोधित तंत्रज्ञान व यांत्रिकीकरणाच्या वापराची माहिती होणेसाठी कारखाना खर्चाने व्हीएसआयच्या ज्ञानयाग व ज्ञानलक्ष्मी प्रशिक्षण कार्यक्रमासाठी पाठविले जाते. यामुळे ऊस उत्पादकांनी सर्व ऊस विकास योजनांचा लाभ घेऊन जास्तीत जास्त ऊस कारखान्याकडे नोंद करन गाळपास द्यावा, असे आवाहन शेरकर यांनी केले.

हुमणी किडीचे भुंगेरे गट ऑफिसला जमा करा
चाल लागवड हंगामापासून विघ्नहर कृषी अमृत फर्मेंटेड सेंद्रीय खत उधारीने वसुली तत्त्वावर माफक दरात उपलब्ध करून दिले जाणार आहे. कारखान्यामार्फत लागवड हंगाम २०३-०४ पासून हुमणी किडीचा प्रादुर्भाव टाळणेसाठी शेतकरी व मजुरांकडून रोख रक्कम प्रतिकिलो २०० रुपयांप्रमाणे हुमणी किडीचे भुंगेरे गोळा करून नष्ट केले जातात. ऊस उत्पादक शेतकऱ्यांनी लागवड हंगाम २५-२६ मध्ये ता. २६ मे ते ३० जून २०२५ या कालावधीत हुमणी किडीचे भुंगेरे गोळा करून कारखाना गट ऑफिसला जमा करावेत, असे शेरकर यांनी सांगितले.