जुन्नर, ता. १० : जुन्नर तालुक्याच्या पश्चिम आदिवासी भागात शेतीपूर्व मशागतीची कामे वेगात सुरू झाली आहे. भात पेरणीला देखील प्रारंभ झाला आहे.
मेमधील पावसामुळे भात पेरणी, मशागतीची कामे करण्यास पुरेसा वेळ मिळाला नाही. रोहिणी ते मृग नक्षत्राच्या दरम्यान धुळ वाफेवरची पेरणी करतात. मात्र मे महिन्यातील पावसामुळे अशी पेरणी करणे शक्य झाले नसल्याचे खटकाळे येथील प्रगतशील शेतकरी रावजी तळपे यांनी सांगितले.
मागील चार-पाच दिवसांपासून पावसाने उघडीप दिल्याने वाफसा असणाऱ्या शेतकऱ्यांनी रविवारपासून (ता.८) मृग नक्षत्र सुरू झाल्याने भात पेरणीला सुरुवात केली आहे.
अवकाळी पावसाने आदिवासी भागात शेतकऱ्यांना शेती पूर्व मशागतीचे कामे करण्यास पुरेसा अवधी मिळाला नाही यामुळे सध्या शेती पूर्व मशागतीची कामे वेगात सुरू आहेत. नांगरणी, उफरणी,बांधबंदिस्ती तसेच दुरुस्तीची कामे सुरू आहेत. भात रोपवाटिका करण्याचे काम सुरू आहे.
दरम्यान, भात पेरणी सुरू होत असताना तालुक्यात युरिया खताचा पुरवठा होत नाही, अशी स्थिती आहे. तालुक्यात युरिया खताचा पुरवठा तत्काळ करावा, अशी मागणी आदिवासी समाज प्रबोधिनीच्या वतीने करण्यात आली आहे. तसेच पावसामुळे न वाळलेला हिरडा ताडपत्रीवर वाळत घालून वाळविण्यात येत आहे.
घराभोवतीची परसबाग करण्यास वेळ मिळाला नाही.यात फळभाजी भाजीपाला लावला जातो.मात्र तो देखील यंदा अजून लावला गेला नाही. यंदा अवेळी पावसामुळे बळी राजाची कामे वाढली असल्याचे हातवीज येथील शेतकरी अनंता पारधी यांनी सांगितले.

08624