जुन्नर, ता. १ : ‘‘पोलिस दुरक्षेत्राची इमारत केवळ एक वास्तू म्हणून न राहता गावाच्या कायदा- सुव्यवस्थेसाठी एक प्रभावी पायरी ठरेल. यामुळे भविष्यात सकारात्मक बदल घडवून आणेल,’’ असा विश्वास माजी आमदार अतुल बेनके यांनी व्यक्त केला.
आदिवासी भागातील इंगळूण (ता. जुन्नर) येथील ब्रिटिशकालीन पोलिस चौकीचे पुनर्जीवन करण्याच्या दृष्टीने नवीन इमारतीच्या कामाचे भूमीपूजन माजी आमदार बेनके यांच्या उपस्थितीत संपन्न झाले. यावेळी बेनके बोलत होते. येथील ब्रिटिशकालीन पोलिस दुरक्षेत्र इमारतीची दुरवस्था झाली होती. ग्रामस्थांची गेली अनेक वर्षांपासून पोलिस चौकीच्या इमारतीची मागणी होत होती. माजी आमदार बेनके यांनी यासाठी आपल्या कार्यकाळात ७५ लाख रुपयांचा निधी उपलब्ध करून दिला.
यावेळी डोळसवाडी ते विरणक वस्ती काँक्रिटीकरण केलेल्या रस्त्याचे लोकार्पण करण्यात आले. याप्रसंगी पोलिस अधिकारी रवींद्र चौधर, पोलिस निरीक्षक किरण अवचर, शाखा अभियंता आगळे, दूध संघाचे माजी उपाध्यक्ष भाऊसाहेब देवाडे, अजिंक्य घोलप यांची भाषणे झाली. यावेळी सरपंच पुष्पा डामसे, उपसरपंच रंजना डोळस, ग्रामपंचायत सदस्य विजय डामसे, दगडू डामसे, प्रभाकर विरणक, अशोक डामसे, मालती डामसे, रंजना डोळस, नंदकुमार कोथेरे, संदीप मुंढे व ग्रामस्थ उपस्थित होते. प्रास्ताविक विजय डामसे यांनी, तर पोलिस पाटील अशोक डामसे यांनी आभार मानले.